Mańǵystaýda 100 myń tonna balyq ósirilmek
Aqtaý qalasynda óńirdiń balyq sharýashylyǵyn damytý máseleleri boıynsha kezdesý ótti. Jıynǵa balyq sharýashylyǵyn damytý jónindegi ýákiletti organnyń, Mańǵystaý oblysy ákimdigi, «Atameken» UKP, «BD - Balyq sharýashylyǵy qaýymdastyǵy» ZTB, balyq sharýashylyǵy sýbektileriniń jáne oblysta balyq ósirý jónindegi jobalardy iske asyrýǵa daıyn ınvestorlardyń ókilderi qatysty.
Onda balyq sharýashylyǵyn damytýdyń 2021-2030 jyldarǵa arnalǵan baǵdarlamasy tanystyryldy, onda 2030 jylǵa qaraı ósirilgen balyq kólemin jylyna 270 myń tonnaǵa deıin, onyń ishinde Mańǵystaý oblysynda jylyna 100 myń tonnaǵa deıin ulǵaıtý kózdelgen. Jalpy, óńirde jumys istep turǵan sharýashylyqtardyń qýatyn keńeıtý, tuqy, bekire, albyrt balyq túrlerin ósirý boıynsha sýmen qamtamasyz etýdiń tuıyq tsıkli bar 20 tor, 1 toǵan, bir sharýashylyq qurý josparlanyp otyr.
Kezdesý barysynda Balyq sharýashylyǵy komıtetiniń tóraǵasy N. Júnisov balyq sharýashylyǵyn memlekettik qoldaý sharalary, onyń ishinde balyq ósirýmen aınalysatyn sýbektiler úshin jasalǵan jaǵdaılardy sýbsıdııalaý jáne zańnamany jetildirý sharalary týraly habardar etti. Sondaı-aq, is-shara barysynda balyq sharýashylyǵy sýbektileri men ınvestorlar kún tártibindegi máseleler boıynsha pikir almasyp, óńirdegi balyq sharýashylyǵyn damytýdyń ózekti máselelerin talqylady.
Sonymen qatar, Ekologııa, geologııa jáne tabıǵı resýrstar mınıstri M. Myrzaǵalıev tuıyqtalǵan sýmen qamtamasyz etý qondyrǵysyn paıdalanatyn, «Kazakh osseter» JShS balyq ósirý sharýashylyǵynyń jumysymen, sondaı-aq bekire jáne aqserke túrin ósirý jobasymen tanysty. Atap aıtqanda, 2030 jylǵa qaraı ónimdiligi jylyna 30 myń tonna, shamamen 27 mlrd teńge ınvestıtsııa quıylatyn «Іnjý-Marjan shyǵanaǵynda aqserke ósirý jónindegi «Sharbaqty balyq ósirý sharýashylyǵyn qurý» jobasymen tanysty. Onyń bastamashysy - «Tehnologııalyq holdıng ınstıtýty» JShS.
Sondaı-aq, «Aqtaý teńiz porty» arnaıy ekonomıkalyq aımaq aýmaǵynda ónimdiligi jylyna 400 tonna taýarly balyq jáne 50 tonna ýyldyryq beretin bekire tuqymdas balyq ósiretin zaýyt salý« jobasymen tanysty. Bul jobanyń bastamashysy - «Beluga Queen« JShS.
