Mańǵystaýda 100-ge jýyq adam karantınde jatyr

AQTAÝ. QazAqparat - Mańǵystaý oblysynda 100-ge jýyq adam aýrýhanalarda karantınde jatyr, dep habarlaıdy QazAqparat tilshisi.

Bul týraly oblystyq densaýlyq saqtaý basqarmasynyń basshysy Ánýar Saǵymbaev málimdedi.

Qazir aımaqta indettiń aldyn alý maqsatynda keshendi sharalar jasalyp jatyr. 70 tósek ınfektsııalyq aýrýlardy qabyldaýǵa, 280 tósek provızorlyq tekserý jasaý úshin, 600-ge jýyq tósek karantınge jatqyzýǵa daıyn. 400-deı turǵyn tekserilip, karantınnen shyqty.

«Keshe túnde 70 jýyq QR azamaty Ystambuldan Aqtaýǵa ushyp keldi. «Tájen» shekaralyq baqylaý beketi arqyly Ózbekstannan 14 Mańǵystaý oblysynyń turǵyny keldi. Barlyǵy tekserilip, arnaıy kóliktermen Aqtaýǵa jetkizilip, karantınge jatqyzyldy. Saraptama qorytyndysy teris nátıje bergen jaǵdaıda úılerine karantınge jiberiledi»,-dedi Ánýar Saǵymbaev.

Óńirdiń bas dárigeri aımaqqa kelgen kez-kelgen turǵyn áýejaıda, temirjol vokzaldarynda, avtojoldarǵa qoıylǵan beketterde medıtsınalyq tekserýden ótip, dene qyzýy ólshenetinin aıtyp ótti.

«Ár aımaqta adam aǵzasynan Covid-19 ınfektsııasyn anyqtaıtyn vırýsologııalyq zerthana bar. Oblysta saraptama jasaıtyn quraldar jetkilikti mólsherde. Barlyǵy tegin jasalady»,-dedi ol.