Mańǵystaýda 1 myńnan astam adam ekpeden bas tartqan
AQTAÝ. QazAqparat - Mańǵystaý oblysynda juqpaly aýrýdyń aldyn-alý maqsatynda osy keseldiń 21 túrine vaktsına salý tegin júrgiziledip. Alaıda, jyl basynan beri óńirde 1 067 adam ekpeden bas tartqan, dep habarlaıdy Qazaqparat.
Josparly ımmýnızatsııalaýdy júrgizýdiń arqasynda sońǵy 10 jylda Mańǵystaý oblysynda juqpaly aýrýlar - oba, ish súzegi, dıfterııa, sirispe, polıomıelıt sııaqty indetter tirkelmegen.
Aqtaý qalalyq qoǵamdyq densaýlyq saqtaý basqarmasynyń basshysy Álııa Jumajanovanyń aıtýynsha, sońǵy ýaqytta vaktsınaǵa qatysty kertartpa pikirlerdiń saldarynan ata-analar ekpe salýdan bas tartyp jatyr.
«Bul qaýesetti rastamaımyn. Óńirde vaktsınanyń keri áseri tirkelgen joq. Sondyqtan barlyq Mańǵystaý turǵyndaryn, barlyq jastaǵy adamdardy ulttyq kúntizbe boıynsha ekpelerdi ýaqtyly alyp otyrýǵa shaqyramyn», - deıdi Álııa Jumajanova.
Aıta keteıik, qazir oblysta ımmýndaý aptalyǵy ótip jatyr.
Eske sala ketsek, QR DSM Sanıtarlyq-epıdemııalyq saraptama jáne monıtorıng ǵylymı-praktıkalyq ortalyǵy Infektsııalyq jáne parazıttik aýrýlardy epıdemııalyq baqylaý departamenti dırektorynyń orynbasary Aınagúl Qýatbaevanyń aıtýynsha, 2018 jyldyń 1 qańtaryna deıingi statıstıkalyq málimette vaktsınatsııaǵa senbeıtinder sany 12 700 adamǵa jetken.
