Mańǵystaý JOO-larynda bilim alý qansha turady
AQTAÝ. QazAqparat - Mańǵystaý oblysynda 26 kolledj ben 2 ýnıversıtet bar.
Óńirdegi JOO-larǵa sholý jasaý kezinde anyqtalǵandaı, orta mektep túlekteriniń besten biri jergilikti JOO-larǵa oqýǵa túsedi, dep habarlady «QazAqparat» HAA tilshisi.
Oblysta Kaspıı memleketik tehnologııa jáne ınjınırıng ýnıversıteti (KMTIÝ) jáne Gýmanıtarlyq-tehnıkalyq ýnıversıtet (GTÝ) bar.
KMTIÝ sońǵy jylda bilim berý aqysyn ósirgen joq. Baǵalardy ýnıversıtettiń saıtynan kórýge bolady, eń tómengisi - 342 myń (ekonomıka salasyndaǵy mamandyq), eń joǵarysy - 443 myń teńge (pedagogıkalyq).
«Biz baǵany ósirgen joqpyz. Suranys pedagogıkalyq, zańgerlik jáne teńiz kóligine qatysty mamandyqtarǵa joǵary, munaı-gaz salasyna suranys ortasha. Túlekterdiń jumysqa ornalasýy ortasha 60 paıyzdy quraıdy. Pedagogıkalyq mamandar úshin bul kórsektish shamamen - 90 paıyz, munaı-gaz salasy 50 paıyzdy quraıdy», - dedi ýnıversıtet rektory Ádilbek Botabekov.
Jekemenshik Gýmanıtarlyq-tehnıkalyq ýnıversıtette bilim alý baǵasy birshama tómen. «Bizde baǵa kóterilgen joq. Keı mamandyqtar boıynsha baǵany 40 paıyzǵa jeńildetý de oıymyzda bar. Kolledjden keıin kúndizgi bilim alý jylyna - 345 myń teńge, syrttaı - 260 myń teńge, al ekinshi joǵary bilimdi syrttaı oqý jylyna 280 myń teńge turady», - dedi GTÝ ókili Dáýlet Qalıev.
Atalmysh JOO mamandyqtarynyń deni mektep túlekteriniń suranysyna ıe.
Keı mańǵystaýlyqtar basqa óńirlerge bilim alýǵa ketedi. Onyń sebepteri ártúrli. Olar ýnıversıtette joq mamandyqty tańdaıdy ne halyqaralyq dıplomy bolǵanyn qalaıdy.
Osyndaı pikirlerge baılanysty óńirde qalatyn túlekterdiń sanyn bilý de mańyzdy. GTÝ-ge joǵaryda aıtylǵandaı, 500 túlek tússe, KMTIÝ-ge de osynsha jas oqýǵa keledi eken.
