Mańǵystaý: Jedel járdem kólikteri 100 paıyz jańartyldy

NUR-SULTAN. QazAqparat – Mańǵystaý oblysynyń ákimi Serikbaı Trumov jýrnalısterge arnalǵan baspasóz máslhatynda koronavırýs ınfektsııasynyń yqtımal ekinshi tolqynyna belsendi daıyndyq barysynda aımaqtaǵy medıtsınalyq uıymdarda materıaldyq-tehnıkalyq bazalardyń barynsha jasaqtalǵanyn aıtty, dep habarlaıdy QazAqparat tilshisi.

Pandemııanyń ekinshi tolqynyna daıyndyq barysynda sońǵy úlgidegi 200 tósek orynmen jabdyqtalǵan modýldik statsıonar ashyldy. Qosymsha 11 ınfektsııalyq statsıonar tolyǵymen jabdyqtalyp, rezervte daıyn tur. Onda 2 452 ınfektsııalyq jáne 131 reanımatsııa tósek-oryny bar. 7 kompıýterlik jáne 4 magnıttik-rezonansty tomograf alyndy. 2 jyljymaly medıtsınalyq keshen, 1 kóshpeli zerthana bar.

«Medıtsına uıymdary 260 ÓJJ apparatymen jáne 638 ottegi kontsentratorymen tolyqtaı qamtyldy. Eń bastysy oblystaǵy jedel-járdem avto parki 100 paıyz jańaryp, 85 sanıtarlyq kólikpen tolyqty. Qazir Mańǵystaýda jaǵdaı turaqty. «Jasyl» aımaqtamyz. Іndet juqtyrýshylardyń sanyn arttyrmaı, jaǵdaıdy barynsha baqylaýda ustap otyrmyz. Ol úshin oblys kóleminde arnaıy monıtorıng toptary qurylyp, tamyz aıynan beri 800-ge jýyq reıd sharalary uıymdastyryldy. Osyndaı qatań karantın sharalarynyń arqasynda óńirdegi jaǵdaı baqylaýda», -dedi oblys ákimi S.Trumov.