Mańǵystaý «jasyl aımaqta» bolǵanymen, keı aýdandarda indet juqtyrǵandar sany ósip jatyr
Onyń aıtýynsha, Aqtaý men taǵy eki aýdanda qaýipti indetti juqtyrǵandar sany kúndelikti artýda.
«Mańǵystaý oblysynyń epıdemıologııalyq ahýaly turaqsyz. Koronavırýstan áli de qaýip bar. Koronavırýs indeti asa qaýipti ekendigine bárimizdiń de kózimiz jetti. Qazir biz maska taǵýdy úırendik. Alaıda áleýmettik qashyqtyqqa mán bermeı júrmiz. Qol berip, qushaqtasyp amandasý, betten súıý, jınalyp toı-tomalaqqa barý, korporatıv uıymdastyrý sııaqty áreketter aýrýdyń kóptep taralýyna yqpal etedi», - dedi Jamal Jamanbaeva.
Spıkerdiń málimetinshe, oblystyq ınfektsııalyq statsıonarlarda 113 naýqas em qabyldap jatyr.
Onyń ishinde 44 naýqastyń test synamasy oń nátıje berse, qalǵandary koronavırýstyq pnevmonııaǵa shaldyqqandar.
Al, úı karantıninde 125 naýqas bar. Infektsııalyq statsıonarlar men mobıldik toptar úzdiksiz jumys istep tur.
Dárilik zattar, qorǵanysh quraldary jetkilikti, mamandar daıyn.
«Taǵy bir aıta ketetinim bar. Jańa jylǵa oraı, úıge Aıaz ata shaqyrý dástúri keń etek jaıyp jatyr. Ózińiz oılanyp qarańyzshy, Aıaz ata sizdiń úıge kelgenshe, qanshama úıde bolǵanyn bilmeısiz ǵoı. Qanshama adammen kóristi, ol vırýsty tasymaldaýshy bolýy ábden múmkin. Jalpy merekelik shara ótkizýdi qoıý kerek. Barlyq saqtyq sharalaryn ustanýymyz qajet. Ózimizdiń jáne jaqyndarymyzdyń densaýlyǵy bizdiń ǵana qolymyzda», - dedi ol.
Baspasóz konferentsııasyna Mańǵystaý oblysy sanıtarııalyq-epıdemıologııalyq baqylaý departamentiniń basshysy Ǵazız Nadýev te qatysty.
Onyń aıtýynsha, óńir boıynsha jeltoqsandaǵy koronavırýstyq kórsetkish qarasha aıymen salystyrǵanda kúrt ósip otyr.
Bul jaǵdaı halyqtyń túrli toı, sadaqa men jasyryndy jıyndardy uıymdastyrýdy toqtatpaǵanynan týyndap otyr.
«Búgingi tańda oblys kóleminde áli de ótip jatqan jıynnyń bárin toqtatý kerek. Keshe ǵana oblys ákimdiginiń keńeıtilgen keńesinde monıtorıng toptaryna tapsyrma berildi. Jańa jylda jasyryn ótkiziletin keshter, erteńgilikter, tabıǵatqa shyǵý sııaqty sharalar qatań baqylaýǵa alynady», - dedi Ǵ. Nadýev.
Eske sala keteıik, Atyraý oblysymen shektesetin Beıneý aýdany Boranqul aýylyna sanıtarlyq post qoıyldy. Bul post qazir jumysyn bastap ketti.
«Bizdi qatty ýaıymdatatyny, koronavırýs indetimen tirkelgenderdiń 70-80 paıyzyn 60-tan asqan qarttarymyz qurap otyr. Olar merekelik jıyndarǵa qatysyp, sol jerde vırýsty juqtyrady. Al olar bolsa aýrýdy kótere bermeıdi. Sońy qıyn jaǵdaıǵa ákep soqtyrady. Jańa jyldyń ózi - otbasylyq mereke. Ony tek januıamen, úıde qarsy alý kerek. Densaýlyq bárinen mańyzdy», - dedi Ǵ. Nadýev.