Mańǵystaý jastaryna bólingen 6 myń bilim grantynyń 75 paıyzy eshkimge berilmeı qalyp qoıǵan
«Óńirlerdegi mektepterdi damytý kerek. Sondyqtan, Oqý aǵartý mınıstrligi ákimdiktermen birlesip, aımaqtardaǵy mektepterdiń qyzmetine taldaý júrgizýi kerek. Sondaı-aq, mektepti damytý baǵdarlamasyn ázirleýge qajetti ádisteme daıyndaýǵa tıis. Jaqynda Bilim berýdi damytýdyń 2022-2026 jyldarǵa arnalǵan tujyrymdamasy bekitiledi. Ony iske asyrý úshin quzyrly organdar tıisti sharalardy ýaqytyly qabyldaýy kerek. Óńirge qajetti kásibı kadrlardy daıarlaý isine basa nazar aýdarǵan jón. Memleket jyl saıyn bilim grantynyń sanyn kóbeıtip jatyr. Bıyl joǵary oqý oryndaryna 73 myń grant berildi. Buǵan qosa men batys oblystarynyń túlekteri úshin qosymsha 10 myń grant bólýdi tapsyrdym. Sonyń 6 myńy Mańǵystaýǵa berildi. Biraq bul granttyń tórtten biri ǵana ıgerilgen. Bul – túsiniksiz jaǵdaı», - dedi jıynda Memleket basshysy.
Onyń aıtýynsha, oblysta bilikti mamandarǵa degen suranys óte joǵary.
«Ashyǵyn aıtsaq, joǵary oqý oryndary jáne quzyrly mınıstrlik kásibı baǵdar berý jumystaryn oıdaǵydaı atqarmaı otyr. Túlekterge jáne ata-analarǵa qosymsha grant bólingeni týraly tolyq aqparat jetpeı jatady. Ǵylym jáne joǵary bilim mınıstrligine arnaıy bilim granttary týraly aqparattyq-túsindirý jumystaryn tıisti deńgeıde júrgizýdi tapsyramyn. Aımaqta jastardyń grantpen bilim alýy, maman tapshylyǵy, túptep kelgende oblystyń damýy – bári ózara tyǵyz baılanysty másele. Sondyqtan, oblys ákimi bul máseleni muqııat qarastyrýy kerek, - dep atap ótti Prezıdent.