Mańǵystaý unyn Qytaıda satýdy josparlaýda
AQTAÝ. QazAqparat - Mańǵystaý Beıneý astyq termınalynyń unyn Qytaıǵa eksporttaýdy josparlaýda. Bul týraly Mańǵystaý oblysynyń ákimi Eraly Toǵjanov jumys saparymen Beıneý aýdanyna barǵan kezde belgili boldy, dep habarlady «QazAqparat» HAA tilshisi.
Beıneý astyq termınaly 2010 jyly paıdalanýǵa berilgen. 16 gektar alańǵa astyqty qaıta óńdeıtin, qurama jem óndiretin avtomattandyrylǵan tseh, elevator ornalasqan. Termınaldyń júk aınalymy jylyna 2 mln tonnany quraıdy. Jyl saıyn 40 myń tonna un, 11 myń tonna qurama jem óndiriledi. Nysanda Beıneý aýdanynyń 146 turǵyny jumys isteıdi. Daıyn ónim Mańǵystaý, Atyraý oblystaryna jetkizilip, Aýǵanstan, Tájikstan, Ózbekstan, Iranǵa eksporttalady.
«Kúzde astyq arzandaıdy. Sondyqtan elevatordy toltyrý úshin naq osy kezeńde bıdaıdy kóbirek satý múmkindigin qarastyrý qajet. Budan basqa, oblys ákiminiń orynbasary Raıymbek Ámirjanovqa Aqtaý ındýstrıaldyq aımaq aýdanynda jergilikti taýar óndirýshiler úshin orama daıyndaý tsehyn ashý máselesin pysyqtaýdy tapsyramyn. Osy jerde ashýǵa bolatyn bolsa, ony nege basqa óńirden satyp alamyz? Sondaı-aq Beıneý termınalynyń unyn Qytaıǵa eksporttaýdy retteýdi tapsyramyn. Olarǵa jetkizý geografııasyn keńeıtýge járdemdesý qajet», - dep atap ótti Mańǵystaý oblysynyń ákimi Eraly Tuǵjanov.
Óńir basshysy Beıneý aýylyndaǵy sý tazalaıtyn qurylǵyny qarap shyqty. Nysan 2016 jylǵy jeltoqsanda paıdalanýǵa berilgen. «Aqbulaq» memlekettik baǵdarlamasyna engizilgen jobanyń quny 2 mlrd teńgeden asady. 45 myń tekshe metr sý úshin bes rezervýar bar. Jabdyqtardyń 65 paıyzy Qazaqstanda satyp alynǵan, Qalǵany Germanııa men Ońtústik Koreıadan alyndy.
