Mańǵystaý túıeleriniń súti Arab Ámirlikterine jol tartady
Dýbaı qalasynda «Bolashaq» aýylsharýashylyq óndiristik kooperatıvi ókilderiniń qatysýymen ótken otandyq taýar óndirýshiler forýmynda mańǵystaýlyq fermerler jetkizilim boıynsha aldyn ala kelisimdi aldy, dep habarlaıdy «QazAqparat» HAA tilshisi.
Forýmdy KAZNEX INVEST eksport jáne ınvestıtsııalar ulttyq agenttiginiń ókilderi uıymdastyrdy.
«Qazir BAÁ naryǵyna shyǵý múmkin bolmaı otyr. Onyń birneshe sebepteri bar. Birinshiden, logıstıka. Eger áýetasymalyn qoldanar bolsaq, bul ózindik qunǵa áser etedi. Al, eger avtokólikti paıdalansaq eki el - Túrkimenstan men Iran arqyly ótýge týra keledi.
Ekinshiden, BAÁ-degi sertıfıkattaý jáne standarttaý júıesiniń talaptary joǵary. Al, oǵan bizdiń fermerler ázirge daıyn emes. Ol úshin qymbat qurylǵylar qajet. Qorytyndylaı aıtsaq, ázirge bizdiń taýarlar BAÁ naryǵyndaǵy jergilikti taýarlarmen básekelese almaıdy. Alaıda, biz Ámirlik turǵyndaryna sapaly sýsyndy - maıly túıe sútin usyna alamyz. Bul - jergilikti turǵyndar men kásipkerler baǵalaıtyn basty ereksheligimiz. Osy ýaqyt ishinde barlyq máselelerdi sheship, sút tasymaldaýdy bastaımyz dep oılaımyn. Bul - shubat emes, túıe súti», - dep atap ótti Bolashaq» aýylsharýashylyq óndiristik kooperatıviniń basqarma tóraǵasy Áset Manov.
Mańǵystaýlyq jáne arab kásipkerleriniń B2B formatyndaǵy sońǵy kezdesýinde 10 kompanııa qyzyǵýshylyqtaryn bildirdi. salikomall.com saýda alańy óz qyzmetin usynyp úlgerdi.
Aıta keteıik, mańǵystaýlyq túıe sútteriniń maılylyǵy 6-7%-ǵa jetedi, al BAÁ-de bul kórsetkish tek 3-4%-dy quraıdy. QR Ulttyq ekonomıka mınıstrligi Statıstıka komıtetiniń deregine sáıkes, eldegi túıelerdiń 30 paıyzy Mańǵystaý oblysynda ósirilýde.
