Mańǵystaý turǵyny Táýelsizdiktiń 30 jyldyǵyna oraı 1750 shaqyrymdy velosıpedpen júrip ótti
AQTAÝ. QazAqparat – Mańǵystaýlyq veloshabandoz Táýelsizdiktiń 30 jyldyǵyna oraı 1750 shaqyrymdy júrip ótti, dep habarlaıdy QazAqparat tilshisi.
Beıneý aýdanynyń metsenaty, jeke kásipker Rábbim Borashev «Beıneý-Shalqar-Torǵaı-Nur-Sultan» baǵytynda velosaıahatqa shyqqan saparyn sátti aıaqtady.
Veloshabandozdyń qurmetine aýyl jastarymen kezdesý uıymdastyryldy.
Jıyn barysynda jıhangez sapar kezinde aralaǵan jerleri men qyzyqty oqıǵalardy aıtyp, suhbat berdi.
«Basty maqsat – ishki týrızmdi damytý. Men saıahat kezinde «Beıneý-Shalqar-Torǵaı-Nur-Sultan» baǵytynda júrip óttim. Ár óńir erekshe qarsy aldy. Ár jerdiń ózindik ereksheligi bar. Óte qatty unady. Osy oraıda jastardy bos ýaqytty tıimdi jumsap, sportpen shuǵyldanýǵa shaqyramyn», - dedi Rábbim Borashev.
Rábbim Borashev endi elimizdiń shyǵysyna saıahattaýdy josparlap otyr. Sondaı-aq velosaıahat jaıynda kitap jazýǵa nıetti.
Aýdan ákiminiń orynbasary Raqymjan Shalabaev «Beıneý aýdanynyń birinshi veloshabandozy» degen jazýy bar sporttyq kıim men jańa velosıpedti syıǵa tartty.
