Mańǵystaý turǵyny bótelkelesin óltirip, máıitin jaǵyp jibergen
AQTAÝ. QazAqparat - Mańǵystaýda osydan úsh aı buryn 43 jastaǵy azamatty soqqyǵa jyǵyp óltirgen kúdikti ustaldy. Qylmysyn jasyrmaq bolǵan sezikti máıitti órtep, oqıǵa ornynan boı tasalaǵan, dep habarlaıdy QazAqparat.
Tergeýshilerdiń aıtýynsha, qolǵa túsken sezikti on bes jylǵa temir torǵa toǵytylýy múmkin.
Qylmystyq is 2018 jyldyń 8 aqpany kúni bolǵan. Kúdiktiniń aıtýy boıynsha, dámhanadan ishimdik iship shyqqan azamattar úıge kelgen soń toılaryn jalǵastyrǵan. Alkogolge sylqııa toıǵan eki azamat, bir-birimen sózge kelip, arada eregis paıda bolady. 31 jastaǵy kúdikti, 43 jastaǵy azamattyń qaq mańdaıynan balǵamen uryp qulatqan. Aıaýsyz soqqynyń astynda qalǵan jábirlenýshi qımyldaýǵa dármeni jetpeı sulyq jatady. Ashýǵa berilgen 31 jastaǵy sezikti, qansyrap jatqan azamatty bólmedegi shıfonerdiń aınasy bar esigin julyp alyp, aına jaq betimen taǵy da birneshe ret kúshtep urǵan. Artynan qansyrap jatqan azamatty úıimen birge órtep jiberip, boı tasalaǵan.
«Órtenip ketken er adamnyń máıiti tabyldy. Sot-medıtsınalyq saraptamanyń qorytyndysy boıynsha onyń zorlyq-zombylyqpen óltirilgeni anyqtaldy. Sol kúnnen bastap shuǵyl izdestirý jumystary júrgizilip, ertesine asa aýyr qylmys jasaǵan Jańaózen qalasynyń turǵyny ustaldy», - deıdi Jańaózen qalalyq ІІB tergeý bóliminiń aǵa tergeýshisi Nurjan Shúrenova.
Aǵa tergeýshiniń aıtýynsha, kúdiktiniń qylmystyq áreketi saralanyp, oǵan QR QK 99-babynyń 2-bóligi 5-tarmaǵymen (asa qatygezdikpen qasaqana adam óltirý) jáne QR QK 202-babynyń 2-bóligi 1 jáne 5-tarmaqtarymen aıyp taǵyldy.
Atalǵan derek boıynsha qylmystyq is sotqa joldandy.
Illıýstratsııalyq foto
