Mańǵystaý prokýrorlary memlekettik qarajat urlanǵan 14 faktini anyqtady
«Atap aıtqanda, Túpqaraǵan aýdany elektr jelileriniń kommýnaldyq mekemesinde 30 mln teńgege jýyq urlyq jasaǵany úshin kináli adam qylmystyq jaýapkershilikke tartyldy. «Ózenınvest» kommýnaldyq mekemesinde 600 mln teńgege jýyq aqsha zańsyz berilgeni, qylmystyq is sotqa jiberilgeni anyqtaldy. Sonymen qatar, jer sharýashylyǵy jónindegi komıssııamen birlesken jumys nátıjesinde jalpy kólemi shamamen 300 myń gektar, kadastrlyq quny 800 mln teńge bolatyn jer telimderi qaıtaryldy», - dedi oblys prokýrory Rýfat Quttyqov.
Jalpy, ótken jyly oblys prokýratýrasy 200-den astam qadaǵalaý aktisin engizdi. Olar negizinen kámeletke tolmaǵandar (31), jer qatynastary (30), kásipkerlik (25), densaýlyq saqtaý (16) salalaryndaǵy zańnamanyń saqtalýyna qatysty.
Engizilgen aktilerdi qaraý nátıjeleri boıynsha 216 myń azamattyń quqyǵy qorǵaldy, onyń ishinde 156 605-i – kámeletke tolmaǵandar, 38 264-i – jer qatynastary boıynsha, 16 259-y – zeınetaqy máseleleri boıynsha. Memleket paıdasyna shamamen 1 mlrd teńge óndirildi: 526 mln – tabıǵatty qorǵaý, 126 mln – zeınetaqy, 42 mln – salyq boıynsha.
Atqarýshy organdardyń 50-ge jýyq zańsyz aktileriniń kúshi joıyldy. Zań buzýshylyqtar boıynsha 900-ge jýyq adam jaýapqa tartyldy. Onyń 242-si sáýlet jáne qurylys salasynda, 215-i – kámeletke tolmaǵandar jáne t.b.