Mańǵystaý perzenthanalarynda jyl basynan 95 sábı shetinedi
ASTANA. QazAqparat - Mańǵystaý oblysy balalar men sábılerdiń ólim-jitimi boıynsha respýblıkada ekinshi orynda, dep habarlaıdy QazAqparat "Moı GOROD" portalyna silteme jasap.
«2016 jyldyń toǵyz aıynda Mańǵystaýda 154 sábı shetinedi, onyń 146-sy - bir jasqa deıingi balalar. Solardyń ishinde 95 bala - perzenthanada, 42 - balalar aýrýhanasynda, 9-y úıinde kóz jumdy. Balalar men sábı ólimi deńgeıiniń artýy Aqtaýda, Túpqaraǵan jáne Beıneý aýdandarynda baıqaldy. Aýdandyq ortalyq aýrýhanalardyń bosandyrý bólimshelerinde náresteler ólim-jitiminiń koeffıtsıenti 13% qurady. Ekinshi deńgeıli perzenthanalarda - 7%, oblystyń perınataldyq ortalyǵynda - 80%. Densaýlyq saqtaý basqarmasy ótkizgen tekseris Beıneý, Túpqaraǵan jáne Qaraqııan aýdandarynda qaıǵyly aıaqtalǵan jaǵdaılardyń kóbeıýi ekiqabat áıelderdiń esepke ýaqytynda turmaýymen, tekserýden tolyq ótpeýimen, merziminen buryn bosanýmen jáne balalardy aýrýhanaǵa jatqyzý tártibiniń buzylýymen baılanysty bolǵanyn kórsetti», - dedi Mańǵystaý oblystyq densaýlyq saqtaý basqarmasynyń basshysy Maral Qadir.
Maral Qadirdiń sózine qaraǵanda, 70% jaǵdaıda shaqalaqtar dúnıege kelgennen keıingi 28 kún ishinde shetinegen.
«2016 jyldyń basynan týa bitken syrqattar saldarynan 18 bala kóz jumdy. Jeti náreste tynys alý organdaryndaǵy aqaýlar pen oqys oqıǵalar saldarynan baqılyq boldy. Tórt sábı úıinde ajal qushty, sebepterin anyqtaý múmkin bolmady, sot-medıtsınalyq saraptama júrgizilmedi, - dedi basqarma basshysy.
Aıta keteıik, balalar arasyndaǵy ólim-jitim deńgeıiniń eń joǵary kórsetkishi Qyzylorda oblysynda tirkelgen.
