Mańǵystaý óńirine japon týrısteriniń qyzyǵýshylyǵy artyp keledi
ASTANA. QazAqparat - Mańǵystaý oblysynyń týrızm basqarmasynyń basshysy Gúljan Baıjaýnova «Mangistau tourism workshop» forýmynda kıeli óńirge týrıster aǵyny nelikten artyp kele jatqanyn aıtyp berdi, dep habarlaıdy «QazAqparat» HAA tilshisi.
Basqarma basshysynyń aıtýynsha, Mańǵystaý óńirinde týrızmniń barlyq túrin damytýǵa tolyq múmkindik bar.
«Aqtaýdaǵy Teńiz portyn Qazaqstandaǵy teńiz qaqpasy dep te ataıdy. Óıtkeni, dál sol jerden shıki munaı ónimderiniń tasymaly júzege asady. Bizdiń qystygúni qatpaıtyn Kaspııimiz táýligine 24 saǵat, jylyna 12 aı boıy toqtamaı jumys atqarady», - deıdi Gúljan Baıjaýnova.
Onyń aıtýyna qaraǵanda, oblys ortalyǵynan jolǵa shyqqannan keıin Beket ata, Shopan-ata, Shaqpaq ata sekildi qasterli oryndardy aralap qaıtýǵa bolady. Mańystaýda 362 kıeli oryn bar. Sondaı-aq, Gúljan Baıjaýnova Ústirt men tarıhy tereńdegi Qyzyl qalanyń tarıhynan syr shertip, Uly Jibek joly dál osy óńirdi kesip ótkenin tilge tıek etti. Bir qyzyǵy, Kúnshyǵys eliniń týrısteri Mańǵystaý óńirine erekshe qyzyǵýshylyq tanytady eken.
«Ústirt shoqysynyń batys kertpeshindegi eń kórkem ári kórýge tamasha jeri - Bozjyraǵa jyl saıyn Japonııadan 300 týrıst keledi. Jalpy, basqa elderdiń týrısteriniń Mańǵystaý óńirine jasaǵan saparlary jıileı tústi. Olar «biz mundaǵy álemniń kez kelgen núktesinde qaıtalana bermes tańnyń atýy men kúnniń batýyn óz kózimizben kórgimiz keledi» dep aıtady», - deıdi basqarma basshysy.
