Mańǵystaý óńirinde radıoaktıvti qaldyqtardy óńdeý kesheniniń qurylysy toqtatyldy

NUR-SULTAN. QazAqparat – Mańǵystaý oblysyndaǵy Qaraqııa aýdany ákiminiń «West Dala» JShS-ne radıoaktıvti qaldyqtarmen jumys isteýge arnalǵan keshen qurylysy úshin jer ýchaskesin jalǵa berý jónindegi qaýlysy kúshin joıdy, dep habarlaıdy QazAqparat jergilikti ákimdikke silteme jasap.

Aýdan ákiminiń radıoaktıvti qaldyqtarmen jumys isteýge arnalǵan keshen qurylysy úshin jer ýchaskesin «West Dala» JShS-ne jalǵa berý týraly qaýlysy Mańǵystaý oblysy mamandandyrylǵan tabıǵat qorǵaý prokýratýrasynyń narazylyǵy negizinde kúshin joıdy. Sebebi, jerdi jalǵa alýdyń bastapqy nysanaly maqsaty ózgergen. Sondyqtan, aýdan ákimdiginiń qaýlysy zańsyz sanalady.

«Atyraý oblysy Mahambet aýdanynda zańdy tulǵa retinde memlekettik tirkeýden ótken «West Dala» JShS Qaraqııa aýdanynda 2010 jyldan bastap qyzmet etedi. Seriktestik 400-ge jýyq adamdy jumyspen qamtyǵan. Sol kezde aýdany ákimdigi qosalqy jer qorynan munaı ónimi qaldyqtaryn qaıta óńdeý úshin jalǵa 30 ga jer ýchaskesin berdi«, - dep habarlaıdy aýdan ákimdigi.

Munan soń 2016 jyly 27 jeltoqsanda nysanaly maqsat «Óndiristik jáne tutyný qaldyqtaryn qabyldaý, ýaqytsha saqtaý, óńdeý, kádege jaratý, zııansyzdandyrý, ornalastyrý men kómý kesheni jáne tazartylǵan sarqyndy sýlardy býlandyrý alańdarynyń qurylysyn salý jáne paıdalaný úshin» dep ózgertilgen.

«Sonymen birge, kompanııa munaı óndirisinde qoldanylatyn tómen deńgeıde radıatsııasy bar qubyrlar men qondyrǵylardy zalalsyzdandyryp, qaıta paıdalaný maqsatynda ınvestıtsııalyq joba usyndy. Quny - 800 mln tg. Joba aıasynda 40 adamdy jumyspen qamtý kózdelgen. Osyǵan baılanysty burynǵy jer kólemine qosymsha 8 ga jer ýchaskesi bólindi», - dep tolyqtyrady atqarýshy organ.

Osylaısha, aýdan ákimdiginiń 2021 jylǵy 18 qańtardaǵy №7 Qaýlysy boıynsha barlyǵy 38 ga jer 2029 jyldyń 20 mamyryna deıin atalǵan seriktestikke jalǵa beriledi.

Alaıda, 2021 jylǵy 2 maýsymda onyń 5, 6 gektarynyń nysanaly maqsaty QR Energetıka mınıstrligi Atomdyq jáne energetıkalyq qadaǵalaý men baqylaý komıtetiniń 14.01.2019 jylǵy №19000486 memlekettik lıtsenzııasyna sáıkes «Radıoaktıvti qaldyqtarmen jumys isteýge arnalǵan, olardy qabyldaý, jınaý, suryptaý, saqtaý, kómý, dezaktıvatsııalaý (jabdyqtardy, materıaldardy, ǵımarattardy), radıatsııalyq reabılıtatsııalaý, rekýltıvatsııalaý, zııansyzdandyrý, óńdeý, joıý boıynsha arnaıy keshen qurylysy úshin» dep ózgertilip berilgen.

Aýdan ákimdigi osy ózgertilgen maqsaty boıynsha jumys júrgizilmegenin, demek qorshaǵan ortaǵa zııan keltirilmegenin alǵa tartady.

Eske salsaq, buǵan deıin AShM paıdalanylmaıtyn aýyl sharýashylyǵy jerlerin memleketke qaıtaryp alý tetikteri týraly aqparat taratqan bolatyn.