Mańǵystaý óńirinde aýyl kásipkerligine memleketten 821 mln teńgeniń nesıesi berilgen
Sonyń ishinde «Nátıjeli jumyspen qamtýdy jáne jappaı kásipkerlikti damytý» baǵdarlamasymen osyǵan deıin 746 mıllıon teńge bólindi. Buǵan qosa Aýyl sharýashylyǵyn qarjylaı qoldaý qory óz qarajatynan aýyldyq jobalarǵa 150 mıllıon teńge bóldi. Bul týraly QazAqparat «Aýyl sharýashylyǵyn qarjylaı qoldaý qory» AQ baspasóz qyzmetine silteme jasap habarlaıdy.
Aıta keterligi, memlekettik baǵdarlama aıasynda Qor tómen protsentpen aýyl turǵyndaryna nesıe usynyp keledi. Baǵdarlama aıasynda kásipker bolamyn degen jumyssyz azamattarǵa, kásibin ári qaraı keńeıtemin degen bıznes ıelerine 6 protsentpen nesıe alý múmkindigi bar.
Mańǵystaý oblysynda osyndaı memlekettik qoldaýǵa ıe bolyp otyrǵan kásipkerlerdiń biri Munaıly aýdany Baıandy aýylynyń turǵyny Amangeldi Óskenov. Ol «Aýyl sharýashylyǵyn qarjylaı qoldaý qorynan» 4 mıllıon teńge nesıe alyp, bes botaly túıe satyp alǵan. «Aıbek» sharýa qojalyǵy kúnine eki mezgil jeti túıe saýyp, 15-20 lıtr sút alady. Meıramhanalar men kórshi-kólemge daıyn shubattyń lıtrin 600 teńgeden satyp otyr.
«Biz kishkentaıymyzdan túıemen ósken adamdarmyz. Onyń babyn bilemiz. Nesıe alǵanǵa deıin de óz kúshimizben kásipti aqyryndap bastap ketken bolatynbyz. Qazir bári jaqsy, alǵan maldarymyz ósip jatyr. Paıdasyn kórip, shubatyn iship otyrmyz. Malymyz óziniń jem-shóbin de aqtaıdy. Jumys isteımin degen adamǵa tabylady. Maldyń paıdasy mol. Tirlik etken adam nanyn tabady», - deıdi Amangeldi Óskenov.
Aıta keterligi, jumyssyz adam nesıe alý úshin aýdandyq Jumyspen qamtý ortalyǵyna tirkelip, «Bastaý bıznes» jobasynyń kýrsynan ótýi kerek. Óz kásibin jańadan bastap jatqandar jeke kásipker retinde tirkeledi.
«Aýylda kásipkerlikpen aınalysatyndarǵa 4, 6, 12 mıllıon teńgege deıin nesıe beremiz. Beriletin nesıe kólemi jobanyń maqsatyna baılanysty. Qor tarapynan mal men qus ósirý boıynsha «Igilik» nesıe ónimi, kásipkerlikti damytý boıynsha «Kásipker», sút qabyldaý beketterin damytýǵa arnalǵan «Birlik», taýarly sút fermalaryn qurý jáne keńeıtý boıynsha «Yrys» nesıe ónimimiz bar», - deıdi Aýyl sharýashylyǵyn qarjylaı qoldaý qorynyń Mańǵystaý oblystyq fılıalyndaǵy nesıe bóliminiń basshysy Sholpan Dúısenbaeva.
Mańǵystaý óńirindegi bes aýdan da bul baǵdarlamalardyń ıgiligin kórip otyr. Naqtyraq aıtsaq, qazirgi tańda fılıalda jalpy somasy 300 mln teńgege jýyq jobany nesıeleý ótinimderi qarastyrylýda.
Aýyl sharýashylyq bıznes túrlerimen qatar, Qor aýylda iske asyrylatyn basqa da kásipkerlikterdi qarjylandyrady. Eń bastysy – bul qyzmetter aýyldy jerlerde kórsetilý kerek.
Nesıe somasy bıznes-josparda kórsetilgen maqsatta ıgerilý kerek. Nesıeniń tıisti baǵyt boıynsha paıdalanylýy qadaǵalanady.
«Nátıjeli jumyspen qamtýdy jáne jappaı kásipkerlikti damytý» baǵdarlamasymen Mańǵystaý oblysynda taǵy bir baǵyt qarjylandyrylady. Agroónerkásip keshenin damytý aıasynda «Sybaǵa» nesıelik ónimi bar. Nesıeler etti baǵyttaǵy iri qara men usaq mal basyn, tehnıka men qurylǵylardy, mal azyǵyn satyp alýǵa beriledi.
Onyń erekshelikteri men jańalyqtaryna toqtalsaq, beriletin nesıe kólemi – 12 mln. teńgege deıin, merzimi 7 jylǵa deıin. Sonymen qosa 2 jylǵa deıingi jeńildik merzimi qarastyrylǵan.
«Mańǵystaý óńirinde qoıdy eksportqa shyǵaryp otyrmyz. Aýyl kásipkerleri nesıelik qarjynyń arqasynda usaq mal alyp, ony bordaqylap, eki jyldan keıin etin tapsyrady. Bul nesıege qol jetkizý úshin sharýashylyqtyń 150 gektar jeri, qorasy bolýy mindetti», - deıdi Aýyl sharýashylyǵyn qarjylaı qoldaý qorynyń Mańǵystaý oblystyq fılıalyndaǵy nesıe bóliminiń basshysy Sholpan Dúısenbaeva.
