Mańǵystaý oblysynyń trassalaryna «elektr baqtashy» ornatyldy

AQTAÝ. QazAqparat - Mańǵystaý oblysynyń respýblıkalyq mańyzy bar joldarynda «elektr baqtashy» ornatyldy. Bul týraly «QazAvtoJol» UK» AQ-dan málim etti, dep habarlaıdy QazAqparat.

«Mańǵystaý óńirinde janýarlardy úrkitetin «elektr baqtashy» (elektropastýh) qurylǵysy ornatyldy. Bul qurylǵy janýarlarǵa qaýip tóndirmeıtinin eskerý qajet (toq kúshi shamamen 12 volt). Ornatylǵan qurylǵynyń jalpy uzyndyǵy — 25 shaqyrym. Qurylǵy «Dossor-Qulsary-Beıneý-Saıótes-Shetpe-Jetibaı-Aqtaý» avtojoly men «Jetibaı-Jańaózen» tasjoly boıynda ornatyldy», - dedi kompanııadan.

Ulttyq kompanııadan málim etkendeı, byltyr respýblıkalyq mańyzy bar avtojoldar boıyna úı janýarlarynyń 14 mýlıajy (túıe, jylqy) jáne 13 myń metr jol qorshaýlary ornatylǵan.

«Mýlıajdar júrgizýshilerge jolǵa kenetten janýarlar shyǵýy múmkin ekenin eske salýǵa arnalǵan. Jol qorshaýlaryna keletin bolsaq, olar «Dossor-Qulsary-Beıneý-Saıótes-Shetpe-Jetibaı-Aqtaý» avtojolyna, «Beıneý-Aqjigit-Ózbekstan shekarasy» avtojolyna ornatyldy.

Bıyl (Man-Ata, Bekı, Jarmysh) sııaqty joldardyń basqa ýchaskeleri de atalmysh jumystarmen qamtylmaq», - dedi «QazAvtoJol UK« AQ baspasóz qyzmetinen.