Mańǵystaý oblysynyń komendanty Tótenshe jaǵdaıdy engizýdiń maqsatyn túsindirdi

NUR-SULTAN. QazAqparat – Mańǵystaý oblystyq polıtsııa departamentiniń bastyǵy Janarbek Baqtybaev óńir turǵyndaryna úndeý joldady, dep habarlaıdy QazAqparat tilshisi.

«Bizdiń oblysymyzda erekshe quqyqtyq rejım belgilengen tótenshe jaǵdaı engizildi. Qazaqstan Respýblıkasy Prezıdentiniń Jarlyǵymen men Mańǵystaý oblystyq polıtsııa departamentiniń bastyǵy Janarbek Baqtybaev Mańǵystaý oblysynyń komendanty bolyp taǵaıyndaldym. Tótenshe jaǵdaıdy engizýdiń maqsaty - tıisti qoǵamdyq qaýipsizdikti qamtamasyz etý, sondaı-aq azamattardyń quqyqtary men bostandyqtaryn qorǵaý. Áleýmettik sıpattaǵy tótenshe jaǵdaı kezinde birqatar ýaqytsha shekteý engizildi. Engizilgen shekteýlerge túsinistikpen qaraýlaryńyzdy suraımyn. Bul sizderdiń qaýipsizdikterińizdi qamtamasyz etý úshin jasalady. Sizderge arandatýshylarǵa ermeýlerińizdi jáne tártip buzýshylyqtarǵa jol bermeýlerińizdi suraımyn», -dedi Janarbek Baqtybaev úndeýinde.

Eske salsaq, QR Prezıdenti Qasym-Jomart Toqaev Almaty oblysynda tótenshe jaǵdaıdy engizý týraly Jarlyqqa qol qoıdy. Buǵan deıin Almaty qalasy men Mańǵystaý oblysynda tótenshe jaǵdaı engizildi.