Mańǵystaý oblysynyń aýdan ortalyǵynda temir joldan ótýge arnalǵan kópir salyndy

Oblys ákimdigi baspasóz qyzmetiniń habarlaýynsha, uzyndyǵy 106 metr jáne bıiktigi 8 metr bolatyn jańa jer ústi ótkeli «JańaOrpa» shaǵynaýdanyn Shetpe aýylynyń ortalyǵyna qosady.

Kópir qurylysynyń qajettiligi týraly máseleni aýdan ardagerleri ótken jyly oblys ákimimen ótken kezdesý kezinde kótergen bolatyn. Jobalyq-smetalyq qujattamasy jasaqtalyp, «KaspııTsement» JShS óz qarajaty esebinen qurylysyn bastap ketti. Qurylys quny 48 mln teńge shamasynda.

- Búgin biz úshin qýanyshty kún - «Jańa Orpa» shaǵynaýdanynyń turǵyndary úshin ótpe jol salyndy. Bul másele 50 jyldan beri sheshimin tappaı keldi. Temir joldan ótý úshin poıyzdyń astynan ótetin edik. Oǵan qosa, balalar sabaqqa barady, oınaıdy. Bul qaýipti boldy, dese de jazataıym oqıǵalar oryn alǵan joq, - dedi Shetpe aýyl turǵyny Qonaqbaı Іzǵalıev.

Respýblıkalyq mańyzdaǵy «Beıneý-Shetpe-Jetibaı-Aqtaý» avtokólik joldarynyń qurylysy jaqyn arada aıaqtalady. Oblystyq «Shetpe-Taýshyq» avtokólik jolyna ortasha jóndeý júrgizilip, sondaı-aq, «Shetpe-Tıgen» joly salynyp jatyr.