Mańǵystaý oblysynyń Aqjigit aýylynda tartylǵan jańa sý qubyry synaqtan ótkizilip jatyr
2022 jylǵy 4 aqpanda «Habar24» telearnasynda « Jol da, aýyzsý da joq: Aqjigit aýylynyń jaǵdaıy « taqyrybynda sıýjet kórsetilip, Mańǵystaý oblysy Beıneý aýdany Aqjigit aýyly halqynyń turǵyn úı-kommýnaldyq jáne turmystyq máseleleri kóterildi.
Jaǵdaıǵa obektıvti qaraý úshin QR IIDM eldimekenniń ınjenerlik-kommýnaldyq jelileri qurylysynyń barysy týraly qosymsha málimetter usynady.
3 myńǵa jýyq turǵyny bar Aqjigit aýyly Beıneý aýdany ortalyǵynan 60 shaqyrym jerde ornalasqan jáne eki bólimshesi bar. Birinshi jáne ekinshi bólimshe arasyn «Beıneý – Tájen - Ózbekstan shekarasy» respýblıkalyq avtojoly bólip tur.
Aýyl ishindegi joldardyń jalpy uzyndyǵy 14,9 shaqyrym. 2,3 shaqyrymdyq asfaltbeton tóselgen jol aýyldyń birinshi bólimshesinde ornalasqan.
Ekinshi bóliginde 2,6 shaqyrym joldyń qurylysy ótken jyly bastaldy . Onda qazir asfalt tóseý jumystary qaldy. Merdiger uıym - «Promstroımontaj-HHІ» JShS jumysty bıyl І jarty jyldyqtyń sońyna deıin aıaqtaýǵa ýáde beredi.
Aýyldyń qalǵan 10 shaqyrym jolyn aldaǵy ýaqytta asfalttaý josparlanýda. 2023 jyly tıisti tehnıkalyq qujattama ázirlenedi.
Aýyzsýmen qamtamasyz etý problemalaryna qatysty aıtsaq, Aqjigit aýylyna sý «Astrahan-Mańǵyshlaq» magıstraldyq qubyrymen beriledi.
Aýyldaǵy sý qubyry jelileriniń jalpy uzyndyǵy 28,6 shaqyrym. Mańǵystaý oblystyq ákimdiginiń derekteri boıynsha sýmen jabdyqtaý qyzmetterimen aýyl turǵyndarynyń basym bóligi, ıaǵnı 2,1 myńǵa jýyq adam qamtylǵan . Ázirge 853 turǵyn sýmen jabdyqtaý jelisine qosylmaǵan.
Aýyldy aýyzsýmen tolyq qamtamasyz etý úshin ótken jyly respýblıkalyq bıýdjetten 183,4 mln teńge (QR IIDM arqyly), jergilikti bıýdjetten 70,7 mln teńge bólindi. Qosymsha 11 shaqyrym sý qubyryn salý jumystary merziminde oryndaldy. Búgingi tańda olardy iske qosý jumystary júrgizilýde. Olar aıaqtalǵannan keıin, shamamen naýryz aıynyń sońyna deıin aýyl halqy tolyǵymen aýyzsýmen qamtamasyz etiledi .
