Mańǵystaý oblysynyń ákimi jýrnalısterdi marapattady
AQTAÝ. QazAqparat - Oblys ákimi Eraly Toǵjanov oblystaǵy barlyq Baılanys jáne aqparat qyzmetkerlerin tól merekesimen quttyqtady. Bul týraly QazAqparat ákimniń baspasóz qyzmetine silteme jasap habarlaıdy.
Saltanatty jıynda óńir basshysy Eraly Toǵjanov jýrnalısterdi quttyqtap sóz sóıledi.
«Sizder Prezıdentimiz Nursultan Ábishuly Nazarbaevtyń calmaqty ıdeıalary men salıqaly bastamalarynyń tóńiregine qoǵamdy toptastyrý, ultty uıystyrýǵa, táýelsiz Qazaqstannyń aqparattyq keńistiginiń qalyptasýy men nyǵaıýyna, elimizdiń saıası turaqtylyǵyna, rýhanı-mádenı, áleýmettik-ekonomıkalyq damýyna, qoǵamnyń ál-aýqatyn arttyrýdy jan-jaqty nasıhattaýǵa zor úles qosyp kelesizder», - dedi Eraly Toǵjanov.
Shara barysynda óńir basshysy Mańǵystaý oblysynyń baılanys jáne aqparat salasynyń damýyna qosqan úlesteri úshin bir top jýrnalıster men baılanys qyzmetkerlerine alǵys hattar tapsyrdy.
Sonymen qatar, kásibı mereke qarsańynda BAQ qyzmetkerleri arasynda ótkizilgen spartakıadanyń (ústel tennısi, bılıard, shaǵyn fýtboldan,boýlıng) qorytyndysyn jarııalap, jeńimpaz komandalarǵa arnaıy syılyqtaryn tabystady. Sporttyq shara óńirdegi salaýatty ómir saltyn nasıhattaý maqsatynda jáne de BAQ ókilderiniń arasyndaǵy dostyq qarym-qatynasty nyǵaıtýǵa baǵyttalǵan.
BAQ ókilderi arasynda ótken spartakıada qorytyndysy boıynsha «Mańǵystaý» telearnasy I oryn ıegeri atanyp, kýbokpen jáne 200 myń teńgeniń sertıfıkatyn aldy. ІІ oryn jeńimpazdary «Mańǵystaý Medıa» ujymy 150 myń teńgelik sertıfıkatpen marapattalsa, «Habar agenttiginiń» aımaqtaǵy menshikti tilshileri III oryndy qanjyǵasyna baılap, 150 myń teńgelik sertıfıkatqa ıe boldy.
Jıyn sońy kontserttik baǵdaralamamen jalǵasty.
