Mańǵystaý oblysynyń ákimi «Qarajanbasmunaı» AQ men onyń enshiles uıymdarynyń jumysshylarymen kezdesti

Kezdesýde kompanııa munaıshylarynyń problemalary qaraldy. Kezdesýge oblys prokýrory Sabyrjan Bekbosynov ta qatysty.

Kompanııa jumysshylarynyń buǵan deıingi aryzdarynyń bárin ákimdiktiń belgilengen ereje boıynsha qaraǵany atap kórsetildi. Jáne olarǵa jaýaptar hattardyń avtory Natalıa Sokolovanyń atyna joldanǵany da aıtyldy.

Dálirek aıtqanda, bitimgershilik komıssııasynda jalaqyny kóterý máselesi boıynsha jumyskerler men jumys berýshiler arasyndaǵy ózara túsinistikke qol jetkizilmedi. Munan soń, kásipodaq ókilderi arasyndaǵy kelispeýshilikter sebebinen, jumyskerlerdiń talaptaryn zańnamamen belgilengen merzimde eńbek arbıtrajy arqyly qarastyrý múmkin bolmaı qaldy. Óz kezeginde, prokýratýra organdary jańa eńbek arbıtrajyn qurý jáne eńbek arbıtrajynyń zańmen belgilengen merzimi ótip ketýine baılanysty eńbek daýyn qaraýy QR - nyń zańnamasyna qaıshy keletindigi týraly túsindirmesin berdi. Sonymen birge, kásipodaq tóraǵasy kásipodaq basqarma otyrysynyń eńbek arbıtrajynyń jumysyn toqtatý týraly 23.02.2011 j. № 1 hattamasyn tabys etti.

Atap aıtatyn nárse, Kásipodaq qyzmetine qandaıda-bir memlekettik organdardyń aralasýyna jol berilmeıdi. Bul rette oblys ákimdigi qabyldanatyn sheshimderdi baǵalaýda ádiletsizdikti boldyrmaý maqsatynda, jumyskerlerge joǵaryda atalǵan daýdy sot tártibimen sheshý jóninde birneshe márte usynys jasady.

Oblys ákimdiginiń ótinishi boıynsha aǵymdaǵy jylǵy 13 mamyrda Aqtaý qalasynda eńbek jáne halyqty áleýmettik qorǵaý vıtse-mınıstri B. B. Nurymbetov basshylyq etken vedomstvoaralyq top jumys istedi. Onyń ózi men top músheleri ujymdyq ótinish jasaýshylardyń bastamashylarymen, onyń ishinde N.G. Sokolovamen de kezdesti, Sokolova ózi tarapynan qoıylǵan talaptarynyń zańdylyǵyn obektıvti jáne túsinikti túrde dáleldeı almady.

Kúni keshe ǵana, QR Eńbek jáne halyqty áleýmettik qorǵaý mınıstri G.N. Ábdiqalyqova buqaralyq aqparat quraldaryna bergen óziniń suhbatynda Qarajanbas ken oryny jumysshylarynyń jalaqyny kóterý jónindegi qoıǵan talaptarynyń negizsizdigi jáne olardyń eńbek zańnamasyna sáıkes kelmeıtindigin málimdedi.

Esterińizge sala keteıik, ruqsat etilmegen ereýil men ashtyq jarııalaý aǵymdaǵy jyldyń 17 mamyrynda zańsyz dep tanyldy. 24 mamyrda Túpqaraǵan aýdandyq sotymen ereýildi zańsyz uıymdastyrǵany úshin N.G. Sokolova aıyppul túrinde, al sodan keıin ekinshi qaıtara zańsyz áreketi úshin - 8 táýlikke qamaýǵa alý túrinde ákimshilik jaýapkershilikke tartyldy.

Jumysshylarmen bolǵan dıalog barysynda oblys ákimi sondaı-aq, olarǵa «ArǵymaqTransServıs» JShS-niń ınjenerlik-tehnıkalyq qyzmetkeri marqum Sábıt Kenjebaevtyń qazasyn óz maqsattary úshin paıdalanýy arǵa jat ekenin jáne oǵan jol berýge bolmaıtynyn eske saldy. S.Kenjebaev birde bir narazylyq aktsııalaryna qatyspaǵan. Onyń óliminiń sebebi - júrek talmasy aýrýy bolǵan. Osy rette keıbireýlerdiń, ózderiniń paıdakúnemdik múddelerine qol jetkizý úshin, osy qaıǵyly faktini paıdalanýy arǵa jat jáne oǵan jol berýge bolmaıdy, dedi ákim.

Kompanııa jumyskerleri men basshylyǵy arasyndaǵy barlyq ózara túsinispeýshilik tek qana quqyqtyq alańda sheshilýi tıis, dedi ákim.