Mańǵystaý oblysynyń ákimi aýyzsý tapshylyǵyn joıý joldaryn usyndy
Oblys ákimi Serikbaı Trumovtyń aıtýynsha, bıylǵy jyldyń bıýdjetinde bul maqsatqa 8 mlrd teńgeden astam qarjy qarastyrylǵan. Qarajatqa Beıneý, Qaraqııa, Munaıly aýdandarynda aýylishilik sý qubyrlarynyń qurylysy aıaqtalady.
«Oblysta aýyldyq eldi mekenderdi ortalyqtandyrylǵan aýyzsýmen qamtý kórsetkishi 69% quraıdy. Jyl sońynda 75% jetkizý josparlandy. Bólingen qarjyǵa osy jyly Beıneý aýdanynda - Beıneý, Boranqul, Sarǵa, Eset, Tólep, Qaraqııa aýdanynda - Jetibaı, Senek, Qulandy, Munaıly aýdanynda - Mańǵystaý-3, Baskudyq, Mańǵystaý aýdanynda - Jyńǵyldy, Túpqaraǵan aýdanynda - Taýshyq, Aqshuqyr, Saıyn aýyldarynda aýylishilik sý qubyrlarynyń qurylysy aıaqtalady. Mańǵystaý aýdanynda – Shetpe, Munaıly aýdanynda - Qyzyltóbe, Mańǵystaý-5 aýyldarynda, Aqtaý qalasynda Prımorskıı turǵyn alqabynda sýmen qamtý nysandarynyń qurylysy jalǵasýda», - deıdi Serikbaı Trumov.
«Jyl saıynǵy halyq sanynyń, ındýstrıaldyq, ınfraqurylymdyq jáne áleýmettik jobalardyń qarqyndy ósýi sý tapshylyǵynyń artýyna ákelýde», - dedi ol.
Boljamdy esepter boıynsha, óńirdiń damý qarqynyn esepke alǵanda sý tapshylyǵy 2025 jyly táýligine 95 myń tekshe metrdi quraıtyn bolady.
«Bul máseleni sheshýdiń birden-bir joly – tuşylandyrylǵan sý óndirý kólemin arttyrý. Bul baǵytta biz «Kaspıı» sý tuşytý zaýytyn táýliktik qýatyn 20 myń tekshe metrge deıin arttyrý jumystaryn bitirdik. Qazirgi tańda Qarjy mınıstrligimen zaýyttyń qýatyn 40 myńǵa deıin jetkizý úshin osy jyly qarjy bólý jumystary pysyqtalýda», - dep atap ótti aımaq basshysy.
Sonymen qatar, ınvestorlarmen jáne óńirdiń munaı óndirýshi kompanııalarymen birlese otyryp, «Kendirli» aımaǵynda (50 myń tekshe metr), Quryq aýylynda (45 myń tekshe metr) jáne «Qarajanbas» ken ornynda (17 myń tekshe metr) sý tuşytý zaýyttaryn salý josparlanǵan.
Osy jobalardyń iske asýy sý óndirý kólemin 130 myń tekshe metrge deıin jetkizýge múmkindik bermek.