Mańǵystaý oblysynyń ákimdigi básekelestik erejelerin buzdy
Belgili bolǵandaı, osy jyldyń tamyz aıynda oblys ákimdigi Aqtaý qalasy men Munaıly aýdanyn energııamen jabdyqtaý máseleleri boıynsha keńes ótkizgen.
Onda Aqtaý qalasynyń tutynýshylaryna qyzmet kórsetetin jańa EJU (energııamen jabdyqtaýshy uıym) anyqtaldy – «Mańǵystaý Jaryq» JShS.
Oblys ákimi orynbasarynyń tóraǵalyǵymen ótken osy keńeste Aqtaý qalasy jáne Munaıly aýdanynyń ákimderikterine turǵyndar arasynda «AllianceEnergoSnab-Aqtaý» JShS energııamen jabdyqtaýshy uıymynyń qyzmetin toqtatatyny týraly túsindirý jumysyn júrgizý tapsyryldy.
Sonyń negizinde abonentter arasynda «AllianceEnergoSnab-Aqtaý» JShS-men shartty buzý jáne «Mańǵystaý Jaryq» JShS-men shart jasasý qajettiligi týraly aqparat taratyldy.
Alaıda, «AllianceEnergoSnab-Aqtaý» JShS energııamen jabdyqtaý boıynsha óz qyzmetin toqtatqan joq jáne monopolııaǵa qarsy organǵa tıisti ótinishpen júgindi.
Monopolııaǵa qarsy organ osy ótinishti qarap, ekonomıkalyq báseke erejeleri buzyldy degen qorytyndyǵa keldi.
Atap aıtqanda, búgingi tańda Qazaqstanda elektrmen jabdyqtaý naryq jáne energııa resýrstaryn jetkizýshiler arasyndaǵy básekelestik qatynastar jaǵdaıynda jumys isteıdi.
Elektr energııasynyń bólshek saýda naryǵynyń jumys isteý tártibi Energetıka mınıstrligi bekitken elektr energııasynyń bólshek saýda naryǵyn uıymdastyrý jáne jumys isteý qaǵıdalarymen reglamenttelgen.
Osy qaǵıdalarǵa sáıkes tutynýshylardyń bir EJU-dan ekinshisine aýysýy qarastyrylǵan.
EJU-ny aýystyrýdy osy naryqtan ketý týraly jarııalaǵan jáne bul týraly óz tutynýshylaryn habardar etken uıymnyń óziniń bastamasy boıynsha júrgizýge bolady ne tutynýshy óz sheshimi boıynsha aýystyra alady.
Alaıda, bul jaǵdaıda EJU-ny ózgertýge belgilengen erejeler boıynsha esh negiz joq.
Osylaısha, ákimdik óz is-áreketterimen óńirdiń energııamen jabdyqtaýshy kompanııalary arasyndaǵy básekege nuqsan keltirdi.
Kásipkerlik kodeksiniń 194-baby negizinde Mańǵystaý oblysy ákimdiginiń atyna is-áreketterinde zań buzýshylyq belgileriniń bar ekendigi týraly habarlama engizildi.
Shyǵarylǵan habarlamaǵa sáıkes ákimdik bir aı merzimde BAQ-ta «AllianceEnergoSnab-Aqtaý» JShS-ne qatysty buryn shyǵarylǵan sheshimderdi joqqa shyǵarýy jáne aldaǵy ýaqytta naryq sýbektileri arasyndaǵy básekelestik qaǵıdalaryn buzatyn osyndaı jáne ózge de áreketterdi jasamaýy tıis.
