Mańǵystaý oblysynyń 2021 jylǵa arnalǵan bıýdjeti bekitildi

AQTAÝ. QazAqparat - Mańǵystaý oblysynyń 2021 jylǵa arnalǵan bıýdjeti bekitildi. Respýblıkalyq bıýdjetten bólinetin transfert pen kredıtti esepke alǵanda jergilikti bıýdjettiń jalpy kólemi 234 mlrd teńgeni qurady, dep habarlaıdy QazAqparat tilshisi.

2020 jyldyń bıýdjetimen salystyrǵanda 11% ósim bar.

Bul týraly Mańǵystaý oblysynyń qoǵamdyq kommýnıkatsııa ortalyǵynda ótken brıfıngte ekonomıka jáne bıýdjetti josparlaý basqarmasynyń basshysy Marına Álibekova málim etti.

Onyń aıtýynsha, jalpy bıýdjetti josparlaý saıasaty óńirdiń turaqty áleýmettik ekonomıkalyq damýyn qamtamasyz etýge baǵyttalǵan.

Keler jyly aýyldyq eldimekenderdiń damýyna erekshe nazar aýdarylady.

2021 jyly «Aýyl - el besigi» baǵdarlamasy boıynsha eki aýylda quny 1,8 mlrd teńge bolatyn 15 jobany júzege asyrý josparlanyp otyr.

«Aýyl - el besigi» baǵdarlamasy sheńberinde búgingi kúni 8 aýylǵa (Beıneý, Aqshuqyr, Qyzyltóbe, Baıandy, Basqudyq, Mańǵystaý, Rahat, Shetpe aýyldary) 63 jobaǵa 5,3 mlrd teńge qarajat qarastyryldy (RB – 5 mlrd teńge, JB - 392,3 mln teńge).

«Olar - 7 áleýmettik ınfraqurylymdyq joba, 8 turǵyn úı-kommýnaldyq sharýashylyq jáne 48 kólik ınfraqurylym obektileriniń qurylysy men ortasha jóndeý jumysy», - dedi Marına Álibekova.