Mańǵystaý oblysyndaǵy Munaıly aýdanyna - 10 jyl
AQTAÝ. QazAqparat - Búgin Munaıly aýdanynyń 10-jyldyq merekesine oraı aýdanda birneshe nysandar ashyldy, dep habarlaıdy QazAqparat oblys ákiminiń baspasóz qyzmetine silteme jasap.
Óńir basshysy Eraly Toǵjanovtyń qatysýymen Basqudyq aýylynda «Muhambet» medıtsınalyq ortalyǵy ashyldy. Nysan jeke kásipkerdiń qarjysyna salynǵan. Joba quny 130 mln teńge. Ortalyq 21 adamdy turaqty jumyspen qamtyp otyr.
Sonymen qatar, Mańǵystaý aýylynda aýmaǵy 1 gektar bolatyn un-jarma kombınaty iske qosyldy. Joba quny 315 mln teńge. Munda 30 adamǵa jańa jumys orny ashyldy.
Munaıly aýdanynyń balalary úshin 100 oryndyq «Murager» balabaqshasy paıdalanýǵa berildi. Mektepke deıingi mekemeni salýǵa jeke kásipker 65 mln teńge jumsaǵan. Jańa nysan 20 adamdy jumyspen qamtıdy.
Merekege oraı ashylǵan kelesi nysan - «Máńgilik el!» monýmenti. Mańǵystaý aýylynyń ortalyǵyndaǵy monýment jas urpaqty elin qurmetteýge, ótkenin qadirleýge, otansúıgishtikke tárbıeleıdi.
Sondaı-aq, aýdan jastarynyń bos ýaqytyn tıimdi paıdalanyp, buqaralyq sportty damytý maqsatynda sport alańy paıdalanýǵa berildi.
Sodan soń, aýdannyń 10 jyldyǵyna oraı saltanatty jıyn ótti. Munda Munaıly aýdanynyń jetken jetistikteri saralanyp, bolashaq jospary aıqyndaldy. Shara barysynda aýdannyń áleýmettik-ekonomıkalyq damýyna qosqan eleýli úlesteri úshin birqatar azamattar Mańǵystaý oblysy ákimdiginiń Alǵysymen marapattaldy.
Munaıly aýdany - elimiz táýelsizdik alǵannan keıin qurylǵan alǵashqy aýdan. 2007 jyly Elbasynyń Jarlyǵymen ashyldy. 10 jyl buryn munda halyq sany 53 myń bolsa, búginde 148 myń adamǵa jetip otyr. Qazirgi tańda munda ondaǵan mektepter men balabaqshalar jáne medıtsınalyq ortalyqtar salyndy. Aýyl sharýashylyǵy men kásipkerlik salasy da qarqyndy damý ústinde. Halyq sany men ekonomıkalyq áleýeti jaǵynan Munaıly aýdany oblys boıynsha aldyńǵy qatarda.
«Rýhanı jańǵyrýdy basty qaǵıdasyna aınaldyrǵan aýdan turǵyndary men rýhty órimtal jastarymyz aýdannyń kórkeıýine, elimizdiń órkendep, órleı túsýine zor úlesin qosyp keledi. Aldaǵy ýaqytta halyq ıgiligine aınalatyn, kórerge kóz súıinetin aýqymdy jobalar aýdan kóleminde júzege asa beredi. Osy baǵyttan aınymaı, jasaǵan ıgilikti jumystaryńyz árkez tabysty bolsyn! Jastarymyz ben bolashaq urpaqtarymyz osy ónegeli isterimizdi jalǵastyrady dep senemin. Munaıly aýdanynyń 10-jyldyq merekesi qutty bolsyn», - dedi Eraly Toǵjanov óziniń quttyqtaý sózinde.
