Mańǵystaý oblysyndaǵy magıstraldi gaz qubyrynda apatty-jóndeý jumystary aıaqtaldy - TJM
ASTANA. Qyrkúıektiń 29-y. QazAqparat - Mańǵystaý oblysynda «Intergaz Ortalyq Azııa» AQ-nyń magıstraldi gaz qubyrynda apatty-jóndeý jumystary tolyǵymen aıaqtaldy.
QR Tótenshe jaǵdaılar mınıstrliginen málim etkendeı, jóndeý jumystary qyrkúıektiń 28-i saǵat 18.00-de aıaqtaldy. Tótenshe jaǵdaıdy joıýǵa «Intergaz Ortalyq Azııa» AQ-nyń keshendi brıgadasy jumyldyryldy (165 adam men 69 tehnıka).
Eske salaıyq, qyrkúıektiń 22-sinde túngi saǵat eki shamasynda Mańǵystaý oblysy Mańǵystaý aýdanyna qarasty Saı-Ótes kentinen 1 shaqyrym jerde «Intergaz Ortalyq Azııanyń» magıstraldi gaz qubyry eki jerden jarylyp, onyń arty órtke ulasty. Qurbandar men zardap shekkender joq.
Apatty aýmaqta órt sol kúni tańerteńgi saǵat 6-da oblys boıynsha TJD órtke qarsy qyzmetiniń 22 adamy men 6 tehnıkasynyń kúshimen aýyzdyqtaldy.
Apat saldarynan 110 kV-tyq joǵary qýatty elektr taratý jelisiniń 200 metri jáne 220 kV-ty joǵary qýatty jeliniń 200 metri zaqymdaldy. Saı-Ótes kentine jaryq qosalqy jeli boıynsha berilip keldi.
