Mańǵystaý oblysyndaǵy qoqıqazdardyń neden ólgeni belgisiz – Ekologııa mınıstri

NUR-SULTAN. QazAqparat - QR Ekologııa, geologııa jáne tabıǵı resýrstar mınıstri Serikqalı Brekeshev Mańǵystaý oblysyndaǵy qoqıqazdardyń neden ólgenin anyqtaý úshin ınspektorlardy jibergenin aıtty, dep habarlaıdy QazAqparat tilshisi.

«Qoqıqazdarǵa kelsek, keshe áleýmettik jelide shynymen bes qoqıǵazdyń ólip jatqany týraly vıdeo jarııalaǵan edi. Bizdiń oblystyq aýmaqtyq ınspektsııa mamandary ol jigitpen baılanysqa shyqty. Vıdeo on kún buryn túsirilgen eken», - dedi Serikqalı Brekeshev Úkimet otyrysynan keıin ótken brıfıngide.

Aıtýynsha, oqıǵa ornyna arnaıy ınspektorlar jiberilipti.

«Biz jibergen ınspektorlar vıdeo túsirilgen orynǵa baryp, synamalar alady. Sol taldaýlardyń negizinde qustardyń neden ólgeni anyqtalady», - dedi vedomstvo basshysy.

Sondaı-aq, ol Qyrǵyz Resýpblıkasynan keletin sý boıynsha eshqandaı táýekel joq ekenin málim etti.

Buǵan deıin Mańǵystaý oblysynda ólgen qoqıqazdardyń tabylýyna qatysty oblystyq orman sharýashylyǵy jáne janýarlar dúnıesi aýmaqtyq ınspektsııasy túsinikteme bergen bolatyn.