Mańǵystaý oblysyndaǵy epıdemıologııalyq ahýal qandaı

AQTAÝ. QazAqparat - Mańǵystaýda epıdemıologııalyq ahýal jaqsaryp keledi. Bul týraly Qoǵamdyq kommýnıkatsııa ortalyǵynda ótken brıfıngide Mańǵystaý oblysy densaýlyq saqtaý basqarmasynyń basshysy Amanbek Jumyrov aıtty, dep habarlaıdy QazAqparat tilshisi.

«Sońǵy aptada koronavırýs ınfektsııasyn juqtyrǵan 234 naýqas jazylyp shyqqan. Reanımatsııalyq tósek sany 57. Búginde tósek oryn tolymdylyǵy 33,3% quraıdy. Rezervte 1 165 tósek oryn bar», - dedi Amanbek Jumyrov.

Spıkerdiń aıtýynsha, qazir aýa raıynyń kúrt salqyndaýyna baılanysty maýsymdyq aýrýlar deńgeıiniń ósý qaýpi týyndap otyr. Máselen, óńirde bir kúnniń ishinde respıratorlyq vırýstyq ınfektsııanyń 83 jaǵdaıy tirkeldi.

«Qazirgi tańda 53 jedel járdem brıgadalary jumys isteýde. 6 qazan kúni oblys kóleminde barlyǵy 606 shaqyrtý túsken. Onyń ishinde koronavırýs indeti – 2 jaǵdaı, pnevmonııa – 4 jaǵdaı, al ORVI boıynsha 83 jaǵdaı. Alǵashqy medıtsınalyq-sanıtarlyq kómek mekemeleri koronavırýs ınfektsııasyn juqtyrǵan 142 adamdy oqshaýǵa aldy. Olardy emdeýge 103 mobıldik brıgada uıymdastyrylǵan», - dedi Amanbek Jumyrov.

Brıfıngige Mańǵystaý oblysy sanıtarııalyq-epıdemıologııalyq baqylaý departamenti basshysynyń orynbasary Gúlnar Kórkinbaeva qatysty. Ol óńir turǵyndarǵa sanıtarlyq talaptardy saqtaýǵa úndedi.

«Aýrý juqtyrý qaýpin tómendetý úshin adamdar kóp jınalatyn jerlerge barýdan bas tartqan abzal. Betperde rejımin saqtap, qoldy jıi jýyp, antıseptıkti qoldanyńyz», -dedi Gúlnar Kórkinbaeva.