Mańǵystaý oblysyndaǵy eki bekette jańǵyrtý jumystary júrgizilip jatyr

AQTAÝ. QazAqparat - Mańǵystaý oblysynda ornalasqan «Tájen» jáne Temir baba«ótkizý beketterin qaıta jańǵyrtý jumystary júrgizilýde, dep habarlaıdy QazAqparat.

Memlekettik kirister komıtetiniń málimetinshe, sońǵy ýaqytta syrtqy saýda, tranzıttik aǵyndardyń ósýiniń oń serpini baıqalady jáne qoldanystaǵy avtomobıl ótkizý pýnktteri shekara arqyly ótetin avtokólik quraldary men tulǵalardyń ósip kele jatqan aǵynyna kúshi jetpeıdi. Osyǵan baılanysty, vedomstvo qazirgi ýaqytta EAEO syrtqy shekarasyndaǵy 9 avtomobıl ótkizý pýnktin jańǵyrtý jáne tehnıkalyq jete jaraqtandyrý jónindegi jobany iske asyrýda.

«Ótkizý pýnktterin rekonstrýktsııalaý olardyń naqty jabylýynsyz, biraq avtokólik pen jeke tulǵalardyń qozǵalysyn shekteı otyryp júrgiziledi. Memlekettik kirister komıteti ýaqytsha qolaısyzdyqtar men shekaradan ótý kezindegi yqtımal kidiristerge túsinistikpen qaraýdy suraıdy.

Ótkizý pýnktterin jańǵyrtýdy aıaqtaý 2024 jyldyń sońyna josparlanýda. Jańǵyrtý aıaqtalǵannan keıin ótkizý pýnktterinde Qazaqstan azamattary men qonaqtarynyń shekaradan ótýi úshin qolaıly jaǵdaılar jasalatyn bolady», - dep jazdy komıtetten.