Mańǵystaý oblysyndaǵy eki aýdan «Kaspıı sý tuşytý» zaýytyna 400 mln teńge qaryz
Jıynda jaz mezgilinde oblystyń eldi mekenderin aýyz sýmen qamtamasyz etý baǵytyndaǵy qabyldanatyn sharalar, balyq sharýashylyǵy salasynda iske asyrylatyn jobalar týraly sóz boldy.
Búginde «Kaspıı sý tuşytý» zaýyty táýligine 20 myń tekshe metr aýyz sý tuşytady. Oblys ákiminiń orynbasary N.Aqqulovtyń málimetinshe, bıyl zaýyttyń qýatyn 40 myń tekshe metrge deıin arttyrý kózdelip otyr. Onyń 5 myń tekshe metrine aldaǵy maýsym aıynda qol jetkizilmek. Qazir sý tuşytý qondyrǵysy salynýda. Joba memlekettik saraptamadan ótip, oń qorytyndy alǵan. Oblys ákimi S.Trumov aldaǵy jazda sý tapshylyǵyn boldyrmaý úshin jobany ýaqytynda júzege asyrýdy qatań tapsyrdy.
Aıta keterlik másele, Munaıly aýdany men Qaraqııa aýdany «Kaspıı sý tuşytý» JShS–ne 400 mln teńgedeı qaryz. Qos aýdannyń bereshegi merziminde ótelmeıtin bolsa, zaýyttyń ary qaraı jumys jasaýyna kedergi keltirýi múmkin. Zaýyt basshysy turǵyndardyń ýaqytyly qaryzyn bermeı jatqanyn aıtyp, aýdan ákimderinen máseleni tezirek sheship berýdi surady.
Oblysta halyqqy tirshilik nárimen qamtý maqsatynda birqatar jobalar júzege asyrylyp jatyr. Jýyrda Munaıly aýdanyndaǵy Baıandy aýylynda táýligine 1 myń tekshe metr sý tuşytý qondyrǵysy qoldanysqa berilgen edi. Aýdanda táýligine qýaty 3 myń tekshe metr sý tuşytatyn taǵy bir qondyrǵy salynbaq. Osy jyldyń 16 aqpanynda «Abyroı Grýp» JShS-men kelisim- shart jasaqtalyp, qurylys jumystary bastaldy. Nysandy tapsyrý 2021 jyldyń mamyr aıyna belgilengen.
Aqtaý qalasy men Aqshuqyr jáne S. Shapaǵatov aýyldaryn úzdiksiz sýmen qamtý boıynsha «Aqtaý qalasyndaǵy ortalyq sýmen jabdyqtaý toraby (TsÝVS-4) nysanyn keńeıtý» jobasy iske asyrylyp jatyr. Oblys ákimi atalǵan jobany merziminde aıaqtaýdy qatań tapsyryp, jeke baqylaýynda bolatynyn aıtty. Óıtkeni, bul joba qala turǵyndary úshin kezek kúttirmeıtin asa qajetti joba.
Jańaózen qalasynyń halqyn taza sýmen qamtý boıynsha Kendirli kýrorttyq aımaǵynda qýaty táýligine 50 myń tekshe metrlik sý tuşytý zaýytyn salý jobasy iske asyrylýda. Sondaı-aq, «QazMunaıGaz» AQ Qarajanbas ken ornynda qýaty táýligine 17,0 myń tekshe metrlik sý tuşytý zaýytynyń qurylysy júrip jatyr. Aıaqtaý merzimi 2021 jyldyń qazan aıyna deıin belgilengen.
Aımaq basshysy S.Trumov aýyz sý óńir halqy úshin asa ózekti másele bolǵandyqtan osy salaǵa jaýapty azamattarǵa atalǵan jobalardy der kezinde júzege asyrýdy tapsyrdy.