Mańǵystaý oblysynda jyl sońyna deıin 4 mádenı nysan ashylady

AQTAÝ. QazAqparat - Mańǵystaý oblysynda jyl sońyna deıin 4 mádenı nysan ashylady, dep habarlaıdy QazAqparat tilshisi. Bul týraly Qoǵamdyq kommýnıkatsııa ortalyǵynda ótken brıfıngide oblystyq Mádenıet, arhıvter jáne qujattama basqarmasynyń basshysy Pánııa Sarmýrzına málim etti, dep habarlaıdy QazAqparat.

«Aýyl - El besigi» baǵdarlamasy aıasynda Jańaózen qalasynyń Rahat aýylynda 300 oryndyq klýb pen kitaphana, sondaı-aq Munaıly aýdanyna qarasty Basqudyq aýyldyq okrýginde 200 oryndyq klýb pen kitaphana salynyp jatyr. Qurylys jumystary aıaqtaldy. Ǵımarattar jyl sońyna deıin tapsyrylady dep kútilýde», - dedi Pánııa Sarmýrzına.

Prezıdent Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýynda balalar men jasóspirimderdi shyǵarmashylyqqa, sportqa baýlý týraly aıtylǵan. Spıkerdiń aıtýynsha, osy baǵytta óńirde 4800 balany shyǵarmashylyq tapsyryspen qamtý josparlandy. Bul úshin oblystyq bıýdjetten qarajat bólindi.

«Búginde Artsport.edu.kz portalyna 96 shyǵarmashyq úıirme uıymdastyrýshylar men 4800 bala tirkeldi. Qazir 3855 bala aqysyz úıirmelerge qatysyp júr. Úıirmeler 24 baǵytta jumys isteıdi. Onyń ishinde sýret, músindeý, kesteleý, kıim tigý, kórkem sóz oqý, bı, balet, quraq tigý, sheshendik óner men halyq aspaptary bar. Sondaı-aq áleýmettik tapsyrys aıasynda 2 jumys júrgizilip jatyr. Bul – aqyndar mektebi men «Altyn oımaq» qolónershilerdi oqytý», - dedi Pánııa Sarmýrzına.