Mańǵystaý oblysynda jyl basynan beri 26 alaıaqtyq faktisi tirkelgen
Marat Ahmetjanovtyń 2023 jylǵa josparlanǵan halyqpen kezdesýi Mańǵystaý oblysynan bastaldy. Kezdesý barysynda aımaqtaǵy krımınogendik ahýal týraly aqparat berildi. Mınıstr jalpy qylmystyń 66%-y oblys ortalyǵynda jasalatynyn atap ótti. Mańǵystaýda 71 urlyq, 1 mal urlyǵy, sondaı-aq jyl basynan beri bir aı ishinde 26 alaıaqtyq faktisi tirkelgen.
Sondaı-aq, ákimdik pen polıtsııanyń nátıjeli jumysynyń arqasynda kópshilikke úlgi tutarlyq aýyldar paıda boldy. Máselen, Mańǵystaý aýdanynyń Ońdy aýyly men Túpqaraǵan aýdanynyń Taýshyq aýylynda qabyldanǵan sharalardyń tıimdiliginiń arqasynda birde-bir qylmys jasalmaǵan.
Turǵyndar men aımaq jýrnalısteriniń suraqtaryna jaýap berip, daýly máselemen júgingen azamattardy jeke qabyldaǵan mınıstr oblystyq polıtsııa departamentinde de boldy. Murajaıǵa soǵyp, ólke polıtsııasynyń tarıhymen tanysty. Aıta ketý kerek, 2019 jyly jańartylǵan mýzeı sol jyly Qazaqstandaǵy polıtsııa departamentteri murajaılary arasynda úzdik úshtikke kirgen. Murajaı meńgerýshisi Aqbala Edigeqyzynyń sózinshe, keń úsh zalda 1,5 myńnan astam qundy jádiger bar.
Al, qalalyq polıtsııa basqarmasynda vedomstvo basshysy kabınetterdiń jaraqtandyrylýyn tekserip, jergilikti polıtseılerdiń jumysyn zerdeledi. Sonymen qatar, mınıstrdiń qatysýymen sport kesheni ashyldy.
Marat Ahmetjanov Mańǵystaý oblysy polıtsııasynyń jeke quramymen de kezdesti. Áriptesterin qyzmetke adal bolýǵa shaqyryp, ketken kemshilikterdi joıyp, olqylyqtardyń ornyn toltyrýǵa birqatar tapsyrma berdi. Jınalys sońynda joǵary nátıjeli jumysymen kózge túsken 15 qyzmetkerdi marapattady.
