Mańǵystaý oblysynda jol apatynda halyq jazýshysy Á. Kekilbaevtiń uly men professor N. Qaıshybaev qaza boldy

Qaıǵyly oqıǵa 17 maýsym kúni Jańaózen qalasy mańynda oryn aldy. Aqtaýǵa bet alǵan kólikte barlyǵy alty jolaýshy bolǵan. Jol apatynda professordyń áıeli men qyzy da zardap shekti, qalǵan eki jolaýshy din aman.

Almaty memlekettik dárigerler bilimin jetildirý ınstıtýtynyń baspasóz hatshysy Áıgerim Qojahmetovanyń aıtýynsha, N. Smaǵululynyń denesi Almatyǵa keshe túnde jetkizildi. Marqumdy aqtyq saparǵa shyǵaryp salý rásimi erteń, 20 maýsym kúni (saǵat 9:45-te) Almaty memlekettik dárigerler bilimin jetildirý ınstıtýtynda ótedi.

Nevrologtar lıgasynyń tóraǵasy, Qazaqstan Respýblıkasynyń nevrologtar qaýymdastyǵynyń jáne Búkilálemdik nevrologııa federatsııasynyń múshesi (WFN) N.Smaǵululy 1961 jyly ómirge kelgen. 1984 jyly Qaraǵandy memlekettik medıtsına ınstıtýtyn, al 1985 jyly ınternatýrany úzdik baǵamen aıaqtady. Eńbek jolyn 1985 jyly nevropatolog-dáriger bolyp bastap, 2007 jyly shıpajaı dırektory laýazymyna deıin kóterildi. Sondaı-aq 2004-2007 jyldary Ońtústik Qazaqstan memlekettik medıtsına akademııasynda júıke aýrýlary, neırohırýrgııa, psıhıatrııa, narkologııa jáne medıtsınalyq psıhologııa kafedrasynda dotsent, 2007-2010 jyldary S. Asfendııarov atyndaǵy QazUMÝ júıke aýrýlar jáne neırohırýrgııa kafedrasynda professor boldy. Al Almaty memlekettik dárigerler bilimin jetildirý ınstıtýtynyń nevrologııa kafedrasy meńgerýshisi qyzmetin 2010 jyldyń tamyzynan beri atqaryp kelgen edi. Ol joǵary kýrs stýdentterine, dárigerlerge arnalǵan 78 ǵylymı jumystyń, oqý quraldary men ádistemelik nusqaýlyqtardyń avtory. Eren eńbegi úshin «Qazaqstan Respýblıkasy densaýlyq saqtaý isiniń úzdigi» belgisimen marapattaldy.