Mańǵystaý oblysynda jaryqty «kezeń-kezeńimen» óshirý rejımi alyndy
«Mamandardyń aıtýynsha, qazandyqtyń oń jaq tuzdy bóliginde zaqymdalǵan 5 ekrandyq qubyr aýystyryldy. Buǵan deıin sol jaq tuzdy bóliginde 12 qubyr aýystyrylǵan bolatyn.
Barlyq montajdaý jumystary aıaqtalǵannan keıin kásiporyn qyzmetkerleri dánekerlengen qubyrlar metaldaryn baqylaýdan ótkizip, gıdravlıkalyq synaqtar júrgizildi.
Qýat blogy 17 tamyzda saǵat 17:30-da engizilgen. MAEK qyzmetkerleri apatty tez arada joıý úshin táýlik boıy úzdiksiz jumys júrgizdi. Energııa blogyn jóndeý josparlanǵan merzimnen buryn aıaqtaldy.
Qazirgi ýaqytta Energııa blogynyń jumysy synaqtan ótkizilýde, halyq pen ónerkásiptik kásiporyndardyń kópshiligi úshin «kezeń-kezeńimen» elektr qýatynan ajyratý rejımi alynyp tastaldy. MAEK mamandary barlyq ýákiletti memlekettik organdarmen jáne kommýnaldyq qyzmettermen turaqty konsýltatsııalar júrgizedi», - delingen málimette.
Eske salaıyq, Mańǵystaý óńiriniń birqatar eldi mekeni 11 tamyz kúni tústen keıin jaryqsyz qalǵan bolatyn. Keıin «MAEK» JShS apattyń sebebin túsindirip, turǵyndar men kásiporyndar úshin elektr energııasy kezeń-kezeńimen ajyratylyp otyratyny habarlandy. Tótenshe jaǵdaı engizý máselesi de qaralyp, elektr energııasy óshiriletin ýaqyttyń kestesi jarııalandy.
Aıta keteıik, bul «MAEK» JShS-daǵy alǵashqy apat emes. Bıylǵy 3 shildede Atyraýda birneshe shaǵynaýdanda jaryq sónip qalǵan edi. Elektr qýatynyń óshý sebebi Mańǵystaý atom energetıka kombınatynyń №1 energııa blogynyń apattyq jaǵdaıda ajyratylýynan bolǵany aıtyldy. Prezıdent Qasym-Jomart Toqaev Atyraý munaı óńdeý zaýyty men Mańǵystaý atom energetıka kombınatynda týyndaǵan jaǵdaı boıynsha memlekettik komıssııa qurýdy tapsyrdy. Keıin Úkimette memlekettik komıssııanyń aldyn ala qortyndysy qaralyp, Premer-Mınıstr Álıhan Smaıylov MAEK-tegi apatqa kináliler jaýapqa tartylatynyn atap ótti.