Mańǵystaý oblysynda jan-janýardyń qutyrýy boıynsha 5 fakti rastalǵan
AQTAÝ. QazAqparat - Mańǵystaý oblysynda jan-janýardyń qutyrý aýrýy boıynsha 5 derek anyqtaldy. Onyń ekeýi - Jarmysh aýylynda, úsheýi - Qaraqııa aýdanynda. Bul týraly 16 aqpan kúni Óńirlik kommýnıkatsııalar qyzmetinde ótken baspasóz máslıhatynda oblys ákiminiń orynbasary Bekmurat Júsipov málimdedi.
Qazir Veterınarlyq baqylaý jáne qadaǵalaý komıtetiniń mamandary Jarmyshta tekserý júrgizip, vaktsınatsııalaýmen aınalysýda. Mamandar osy ýaqytqa deıin 27 synamany Astanaǵa jibergen.
«Jarmysh aýylynda 2 túıe, Qaraqııa aýdanynda 1 túıe, 1 jylqy jáne 1 jabaıy qasqyrdyń qutyrý aýrýymen aýyrǵany anyqtaldy. Bul ólgen jan-janýarlardy zerthanaǵa tapsyrýdyń qorytyndysy boıynsha belgili bolyp otyr», - deıdi Bekmurat Júsipov.
Qazir Jarmyshtaǵy eki sharýa qojalyǵy men Qaraqııa aýdanynyń Bostan, Qurandy jáne Quryq aýyldarynyń keıbir eldi mekenderinde shekteý qoıylǵan.
«Shekteý qoıyldy degenimiz - karantın emes. Karantın - bul búkil bir terrıtorııany jabý, ol terrıtorııaǵa kirip-shyǵýǵa tyıym salý. Shekteý kezinde ondaı tyıymdar qoıylmaıdy. Sondyqtan, bizdiń oblysta - karantın joq. Tek aýrý tabylǵan keıbir qoralarǵa, aýyldarǵa ǵana shekteý qoıyldy»,- dep atap ótti oblys ákiminiń orynbasary.
Atap ótilgendeı, qutyrý aýrýy shyqqan sharýa qojalyqtarynda maldarmen qosa adamdarǵa da ekpe jasalýda.
«Respýblıkalyq epızootııaǵa qarsy jasaqtyń» mamandaryna qutyrý aýrýyna qarsy dári keldi. 19 bas múıizdi qara, 814 bas múıizdi usaq malǵa, 78 bas túıege, 19 bas jylqy malyna jáne 3 ıtke qutyrýǵa qarsy vaktsına egilip jatyr. Dáriler Astanadan keldi»,- dedi QR AShM Veterınarlyq baqylaý jáne qadaǵalaý komıtetiniń Mańǵystaý oblysy boıynsha bas memlekettik veterınarlyq-sanıtarlyq ınspektory Qýanyshkereı Myrzataev.
Eske salaıyq, elimizdiń birqatar buqaralyq aqparat quraldary Mańǵystaýdyń Jarmysh aýylynda túıeler jappaı qyrylyp jatqany týraly habarlaǵan bolatyn.
Bul aqparatty keıin Mańǵystaý oblystyq veterınarııa basqarmasynyń basshysy Shamǵalı Hamıev teriske shyǵardy.
«Jarmysh okrýginde 40 túıe óldi degen qaýeset shyqqan. Ondaı málimet resmı tirkelgen joq. Jalǵyz Jarmysh emes, aýdandaǵy búkil aýyldar boıynsha eki aıdyń ishinde 10 túıeniń ǵana materıaly tapsyrylǵan. Eki túıeden ǵana qutyrýdyń qozdyrǵyshy anyqtaldy. Qutyrý aýrýy qorytyndysy berilgen eki sharýashylyqqa shekteý sharalary engizildi. Qutyrý - karantın jarııalanatyn aýrýdyń túrine kirmeıdi, tek shekteý sharalary engiziledi», - dedi Shamǵalı Hamıev.
