Mańǵystaý oblysynda úı salýǵa 9,5 myń jer telimi daıyndalady

NUR-SULTAN. QazAqparat – Mańǵystaý oblysyn damytýdyń 2025 jylǵa deıingi keshendi jospary aıasynda úı salýǵa arnalǵan 9,5 myń ýchaskege ınjenerlik ınfraqurylym tartylady, dep habarlaıdy QazAqparat tilshisi.

Bul týraly QR Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda málim etti.

«Mańǵystaý oblysyn áleýmettik-ekonomıkalyq damytýdyń 2021-2025 jyldarǵa arnalǵan keshendi jospary aıasynda memleket qarajaty esebinen jalpy aýdany 151,2 myń sharshy metr nemese 2,5 myń jalǵa beriletin jáne kredıttik baspanamen qamtamasyz etý josparlanǵan», - dedi mınıstr.

Onyń sózinshe, óńirdegi jappaı turǵyn úı qurylysy júretin aýdandardy qajetti ınjenerlik ınfraqurylymmen qamtamasyz etý úshin 2025 jylǵa deıin 34,7 mlrd teńge bólinedi.

Sol qarajattyń bir bóligi 9,5 myń jer ýchaskesin ınjenerlik ınfraqurylymmen qamtamasyz etýge baǵyttalmaq.

«Keshendi jospar sheńberinde sýmen jabdyqtaý jáne sý burý jobalaryn iske asyrýǵa respýblıkalyq bıýdjetten 126 mlrd teńge qarajat bólý kózdelgen.

1867 shaqyrym sýmen jabdyqtaý jáne sý burý jelilerin, sondaı-aq 3 sýmen jabdyqtaý jáne 1 sý burý obektisin salý jáne jańǵyrtý josparlanǵan.

Sondaı-aq, keshendi jospar aıasynda jalpy somasy 1,8 mlrd teńgege 27 kóp páterli turǵyn úıdi kúrdeli jóndeledi», - dep túıindedi mınıstr.