Mańǵystaý oblysynda ulttyq qaýipsizdikti qamtamasyz etýge qatysty keńes ótti

ASTANA. QazAqparat - Aqtaý qalasynda Qazaqstan Respýblıkasy Prezıdentiniń kómekshisi - Qaýipsizdik keńesiniń hatshysy Vladımır Jumaqanovtyń tóraǵalyǵymen keńes ótkizildi, dep habarlaıdy Aqordanyń baspasóz qyzmeti.

Otyrysqa mınıstrlikterdiń, arnaýly jáne quqyq qorǵaý, sondaı-aq atqarýshy memlekettik organdardyń basshylary qatysty.

Іs-shara barysynda Mańǵystaý oblysynda ulttyq qaýipsizdikti qamtamasyz etý salasyndaǵy Qazaqstan Prezıdenti tapsyrmalarynyń oryndalý barysy qaraldy. Atap aıtqanda, qoǵamdyq qaýipsizdik, din salasyndaǵy problemalar, sondaı-aq terrorıstik qaýip pen tótenshe jaǵdaılarǵa qarsy turýǵa daıyndyq deńgeıi talqylandy.

Ahýalǵa keshendi zertteý júrgizý úshin óńirge vedomstvoaralyq jumys toby jiberildi, oǵan Prezıdent Ákimshiligi, Bas prokýratýra, Ulttyq qaýipsizdik komıteti jáne basqa da ýákiletti organdardyń jaýapty qyzmetkerleri engen.

V.Jumaqanov jaýapty memlekettik organdarǵa Mańǵystaý oblysyndaǵy tájirıbeniń negizinde jasalǵan qorytyndylar men usynystardy eskerip, jan-jaqty taldaý jasaý jáne jalpy eldegi ulttyq qaýipsizdikke tónip turǵan qaýip-qater deńgeıin tómendetý baǵytynda tıisti jumystardy uıymdastyrý qajet ekenin aıtty.

Jumys qorytyndysy boıynsha ortalyq jáne jergilikti atqarýshy memlekettik organdarǵa naqty tapsyrmalar berildi.