Mańǵystaý oblysynda úlgili otbasylar anyqtaldy

Mańǵystaý oblystyq ishki saıasat basqarmasynan málim etkendeı, 2014 jyldan beri «Mereıli otbasy» ulttyq konkýrsy jyl saıyn respýblıkamyzdyń barlyq óńirlerindegi turǵyndardyń qyzyǵýshylyǵyn týǵyzyp, belsendiligin arttyrýda. Baıqaýdyń aımaqtyq kezeńi oblystyq ishki saıasat basqarmasynyń uıymdastyrýymen ótedi.

2016 - 2018 jyldary aralyǵynda óńirlik baıqaýǵa oblystyń aýdandary men qalalarynan munaı-gaz, energetıka, bilim, aýylsharýashylyq, óner salalarynan barlyǵy 109  otbasy qatysty.

2014 jyly Mańǵystaý oblysynyń namysyn QR Ulttyq Paralımpıadalyq komıtetiniń vıtse-prezıdenti, voleıboldan QR bas bapkeri Nuraly Qulyshevtyń otbasy qorǵady.

2015 jyly oblys namysyn qorǵaǵan, 12 bala, 46 nemere, 41 shóbere tárbıelep otyrǵan baqytty otbasy Qulsarıevter oblystyq jáne respýblıkalyq deńgeıde konkýrs jeńimpazy atandy.

2016 jyly Mańǵystaý aýdanynan Qurmashevtar otbasy jeńimpaz boldy. Qurmashev Aldabergen 48 jyl ustazdyq etken, QR Bilim berý isiniń úzdigi.

2017 jyly Túpqaraǵan aýdanynan Qanjanovtar otbasy jeńiske jetti.  Qanjanov Táýirhan «Eren eńbegi úshin», «Eńbek ardageri» medaldarymen, «Eńbek Qyzyl Tý» ordenimen marapattalǵan. Túpqaraǵan aýdanynyń Qurmetti azamaty

Al 2018 jyly  baıqaýǵa qatysýǵa oblystyń aýdandary men qalalarynan munaı-gaz, energetıka, bilim, kásipkerlik, aýylsharýashylyq, óner salalarynan barlyǵy 25 otbasy ótinimderin berdi.

Nátıjesinde ІІІ orynǵa Beıneý aýdanynan Ómirovter otbasy laıyq dep tanyldy. Otaǵasy Ómirov Ótepqalı Júndibaıuly 1956 jyly týǵan. Zerger, qazaq halqynyń dástúrli zergerlik ónerin, músin, kórkemsýret, dombyra, bı jáne sóz ónerin nasıhattaýmen aınalysady. «Mańǵystaý oblysynyń úzdik kásipkeri» ataǵyn  eki ret ıelengen. «Úzdik taýarlar» aımaqtyq kórme-konkýrsynyń laýreaty. «Mańǵystaý juldyzdary» festıvaliniń eki dúrkin laýreaty, birneshe dıplomdar men alǵys hattarmen marapatalǵan.

Joldasy - Esetova Aınahan Yǵylmanqyzy Mańǵystaý oblystyq «Mańǵystaý» gazetiniń Beıneý aýdanyndaǵy  menshikti tilshisi. Búgingi tańda «Ómir syry», «Oljashy shejiresi», «Aqjeleń», «Arystardyń aty jetsin urpaqqa», Mańǵystaý aqyn jazýshylary kitaphanasy serııasymen óleńder toptamasy, «Jyr marjany» Qazaq poezııasynyń antologııasy, «Boıtumar», «Ústirt balladalary» kitaptarynyń avtory. Otbasynda eki ul men bir qyzy jáne bir nemeresi bar. Balalarynyń barlyǵy óner, bilim saıystarynyń jeńimpazy.

ІІ oryn Mańǵystaý aýdanynan Ozǵanbaevtar otbasy buıyrdy. Ozǵanbaev Tóreáli - 85 jastaǵy tyl ardageri, 40 jyl ustazdyq etken zeınetker, KSRO jáne Qazaq KSR aǵartý isiniń úzdigi, Qazaqstan halyq aǵartý isiniń úzdigi.

Ustazdyq etken jyldarynda «V.I.Lenınniń  týǵanyna  - 100 jyl»,  «Eńbek ardageri» jáne «Oqý aǵartý isiniń úzdigi» medaldarymen marapattalǵan. Búgingi tańda bilim bergen L.K.Qıynov syndy kóptegen shákirtteriniń ózi halqyna qyzmet etip, zeınet jasyna jetken.

Joldasy Qazturǵanova Dámejan aýyl sharýashylyǵy salasynda mal dárigeri bolyp qyzmet atqarǵan. 2006 jyly 70 jasynda ómirden ozdy. Býgingi tańda 7 bala tárbıelep, ulyn uıaǵa, qyzyn qııaǵa qondyrǵan. Balalary bilikti mamandar. Otbasyndaǵy balalary men kelinderin eseptegende 8 bilikti ustaz bar. Tórt ul jáne úsh  qyzdan 33 nemeremen 19 shóbere súıip, qazaqy otbasynyń naǵyz beınesin qalyptastyrdy.

І oryn jeńimpazy - Qaraqııa aýdanyń Kóshenovter otbasy. Kóshenuly Tursynǵalı 1934 jyly Fort-Shevchenko qalasynda dúnıege kelgen. 1959 jyly Baký ınstıtýtyn bitirgen. Burǵylaýshy kómekshisinen bastap «MańǵyshlaqMunaıGazBarlaý» trestiniń basshysyna deıin qyzmet etti. Qaraqııa aýdanynnyń Qurmetti azamaty, QR jer qoınaýynyń Qurmetti barlaýshysy, QR Prezıdentiniń Qurmet gramotasymen marapattalǵan. Sondaı-aq «Enbek ardageri», «V.I.Lenın 100 jyldyǵy», «1920-1970 j.j. QR 50 jyldyǵy», «Qazaqstan munaıyna 100 jyl» jáne taǵy basqa medaldary bar.

Jubaıy - Júsipqyzy Qanshaıym Taýşyq aýrýhanasynda qyzmet atqarǵan. Otbasynda 4 qyz jáne 2 uly bar olardan taraǵan  20 nemere, bir shóberesi bar.

Al baıqaýdyń Bas júldesi Jańaózen qalasynan Qaldamanovtar otbasyna berildi. Otaǵasy Qaldamanov Isenbaı Ábeıuly 1968 jyly dúnıege kelgen. 2008 jyldan bastap «Kaspıı» pedagogıka jáne salalyq tehnologııalar kolledjin ashyp, qazirgi tańda kolledj dırektory qyzmetin atqarýda. Memlekettik «Balapan» baǵdarlamasy aıasynda 2010 jyly 75 balaǵa arnalǵan «Kaspıı» balabaqsha ashqan, 2017 jyly «Kaspıı» zııatkerlik mektebin ashyp, búgingi tańda Jańaózen qalasynyń 150-ge jýyq bastaýysh synyp oqýshylaryna bilim berýde.

Qaladaǵy barlyq qaıyrymdylyq sharalaryna belsendi atsalysyp keledi, sonyń ishinde jetim jáne jartylaı jetim, áleýmettik jaǵynan álsiz otbasylarǵa jáne aýyrǵan balalarǵa, daryndy jastarǵa kómegin berip keledi. Sonymen qatar áleýmettik jaǵdaıy tómen otbasylardyń balalary kolledj esebinen tegin bilim alýda, osy úrdis árbir oqý jyly saıyn óziniń jalǵasyn tabýda.

2017 jyldyń úzdik kásipkeri, ulaǵatty ustaz (tarıh páni boıynsha), «Daýymshar batyr jáne onyń urpaqtary» kitabynyń jaryqqa shyǵýyna  atsalysqan, QR bilim berý isiniń Úzdigi, 2016 jyldyń úzdik kásipkeri, «Rýhanı jańǵyrý» baǵdarlamasy aıasynda 2017 jyly ótken oblystyq «Týǵan jerge taǵzym» metsenattar forýmynda «Úzdik ujym» ataǵyn ıelendi, metsenat, Jańaózen qalalyq máslıhatynyń depýtaty. 2018 jyly І Respýblıkalyq «Órleý» ınstıtýtynyń uıymdastyrýymen «Úzdik menedjer» baıqaýynda «Úzdik strateg» nomınatsııasyn jeńip aldy. Jastardyń salaýatty ómir saltyn qalyptastyrýǵa jáne ulttyq at sport túrlerin  damýyna  qosqan úlesi zor.

Jubaıy - Rametýlla Zlıha Maqsýtqyzy aǵylshyn tili pániniń oqytýshysy, ulaǵatty ustaz, joǵary sanatty tájirıbeli bilikti maman, Qazaqstan Respýblıkasynyń Bilim berý isiniń qurmetti qyzmetkeri. Otbasynda eki ul men eki qyzy jáne 5 nemeresi bar. Ónegeli úlgili otbasy.

Endi Qaldamanovtar otbasy «Mereıli otbasy» ulttyq baıqaýynyń respýblıkalyq kezeńinde oblys namysyn qorǵaıtyn bolady.