Mańǵystaý oblysynda úlgili atanǵan aýylǵa 7,5 mln teńge syıaqy berildi
Baıqaýdy oblystyq Tabıǵı resýrstar jáne tabıǵat paıdalanýdy retteý basqarmasy jarııalaǵan. Kóshelerdi abattandyryp, jasyl-jelekke aınaldyrǵan aýylda turǵyndar da tabıǵatty aıalaýǵa úles qosyp keledi.
Jasy 70-ten asqan Bazarbaı Hodjaevtyń aýlasynda 100-den astam aǵash máýelep tur. 2 sotyq jerinde túrli jemis-jıdek ónim berýde. Qyzyltóbe aýylynyń turǵyny baıqaýda «eń jasyl aýla» atalymy boıynsha úzdik atandy. Aqsaqal talmaı eńbek etýdiń arqasynda on jylda úıin tanymastaı ózgertken. Ákesine balalary qolǵabys jasaǵan.
«Jazǵy, qysqy almurt, alma, 10 túpteı qysqy alma, nar, aıva, júzim bar. Jerimiz ónimdi jaqsy beredi. Biraq sý jetispeıtin kezi bolady. Qıynshylyqsyz eshteńe bolmaıdy. Shelektep quıamyz, mashınamen tasyp sýaramyz», - deıdi Qyzyltóbe aýylynyń turǵyny Bazarbaı Hodjaev.
Al, «eń úlgili aýyl» atalymy boıynsha baıqaý turǵyny 3 myńnan asatyn jáne 3 myńǵa deıin turǵyny bar eldi-mekender arasynda ótti. Nátıjesinde alǵashqysy boıynsha Qyzyltóbe kenti «Eń úlgili aýyl» ataǵyn jeńip alyp, 7,5 mln teńgeni ıelendi. Al, 3 myńǵa deıin turǵyny bar aýyl arasynda Syńǵyrlaý men Bostan aýyly jeńimpaz atandy.
«Bul konkýrsqa 10 shaqty aýyl qatysty. Marapat alǵan aýyldar qarajatyn aýyldyń jaǵdaıyn, ekologııalyq ahýaldy jaqsartýǵa, aǵash egýge, kógaldandyrýǵa jumsaıdy. Osy qarajattyń ishinen úzdik bolýǵa atsalysqan azamattarǵa 20% deıin syılyq retinde berýlerine bolady», - deıdi Mańǵystaý oblystyq Tabıǵı resýrstar jáne tabıǵat paıdalanýdy retteý basqarmasynyń basshysy Dúısen Quspekov.
Jıynda mektepte jylyjaı salyp, oqýshylardy eńbekke baýlyp júrgen bilim ordalary men balabaqshalar da tys qalmady. Sondaı-aq, ekologııa taqyrybynda qalam terbep júrgen BAQ ókilderi de marapattaldy.