Mańǵystaý oblysynda «ý shashqan» ushaqqa qatysty túsinik berildi
AQTAÝ. QazAqparat - Mańǵystaýlyqtar «Aqtaý qalasynda ushaqtan ý shashyp jatyr» dep aıtylǵan belgisiz áıeldiń vıdeosyn áleýmettik jelide taratyp jatyr, dep habarlaıdy QazAqparat tilshisi.
«Mine, 13 qazan 2020 jyl, Aqtaý qalasy. Mine, ý shashyp jatyr ǵoı. Adamdar aýyrmaı qaıtedi? Aspanda shashyp júr», - deıdi vıdeoda áıel.
Osy vıdeoǵa qatysty Aqtaý Halyqaralyq áýejaıynyń atqarýshy dırektory Erǵazy Joldasov jaýap berdi.
«Bul – ushaqtyń qozǵaltqyshynan shyqqan kondensat. Ol jerge túspeıdi. Ushaq ushatyn bıiktiktegi aýa temperatýrasy – 60 gradýs. Ushaqtan shyqqan ystyq aýa salqyn aýamen aralasyp, qatyp qalady. Biraq 4-5 mınýt ótkennen keıin aýada shashyrap ketedi. Kún shyqqanda jáne batqanda qyzyl tús beredi. Al, kúndizgi ýaqytta aq bolyp kórinedi. Qarańǵy ýaqytta – kógildir bolady. Kún sáýlesi qalaı tústetinine baılanysty. Mańǵystaý oblysy toǵyz joldyń toraby bolǵasyn, oblys aýmaǵynan birneshe baǵytta ondaǵan ushaq ótedi. Qazaqtar ony «Qus joly» dep aıtady», - deıdi Erǵazy Joldasov.
