Mańǵystaý oblysynda túıelerden qaýipti aýrý tabylǵan joq
Vedomstvo málimetinshe, QR AShM Veterınarııalyq baqylaý jáne qadaǵalaý komıtetine Mańǵystaý oblystyq veterınarııa basqarmasy men oblystyq aýmaqtyq ınspektsııasynan osy jyldyń qyrkúıeginen jeltoqsanǵa deıin túıelerdiń sheshek aýrýyna ushyraýy týraly habarlama kelip túsken. Atap aıtqanda, qyrkúıekte - 6 túıe, qazanda - 3 túıe, jeltoqsanda - 5 túıe aýrý kúdigine ilikken. Oblysqa epızootologııalyq tekserý jáne synama alý úshin «Veterınarııa boıynsha ulttyq referenttik ortalyq» RMM qyzmetkerleri birneshe ret jiberilgen.
«Atalǵan ortalyqtyń hattamalyq synaqtaryna sáıkes qyrkúıek jáne qazanda alynǵan bıologııalyq synamalardan sheshek aýrýynyń belgileri tabylǵan joq. Jeltoqsanda túıelerden qosymsha synamalar alynyp, «Respýblıkalyq veterınarııalyq zerthana» RMK Mańǵystaý oblystyq fılıalyna jiberilgen. Aýrý janýarlardyń arasynda ólim joq. Klınıkalyq belgileri boıynsha túıeniń sheshegi kúdigi alynyp tastaldy. Degenmen, monıtorıng júrgizý barysynda osy jyldyń 16-21 qazany aralyǵynda zertteý maqsatynda 45 túıeden (Mańǵystaý aýdany - 6 bas, Qaraqııa aýdany - 33 bas, Jańaózen - 6 bas) qosymsha bıologııalyq materıal iriktep alyndy. Asa qaýipti aýrýlardy boldyrmaý úshin «VBURO» RMK júrgizgen zerthanalyq zertteýlerdiń nátıjelerine sáıkes, aýsyl, pasterellez, lısterıoz, sibir jarasy, týberkýlez jáne sheshek aýrýlaryna júrgizgen zerthanalyq zertteýlerdiń nátıjeleri teris bolyp shyqty. Nátıjeler Komıtettiń Mańǵystaý oblystyq aýmaqtyq ınspektsııasyna jiberildi», - dep atap ótedi mınıstrlikten.
Qalyptasqan jaǵdaıdy egjeı-tegjeıli zertteý úshin Manǵystaý oblysyna 2020 jyldyń 3 qańtarynda komıtettiń, «VBURO» RMK, «Respýblıkalyq veterınarııalyq zerthana» RMK-niń ókilderiniń «Qazaq ǵylymı-zertteý mal dárigerlik ınstıtýty» JShS jetekshi ǵalymdarynyń barýy josparlanǵan. Aımaqtyń epızootııalyq jaǵdaıy Mańǵystaý oblysynyń veterınarııalyq qyzmetiniń baqylaýynda tur.
Buǵan deıin Mańǵystaýda belgisiz indet juqtyrǵan túıelerden alynǵan synama 3 táýelsiz veterınarııalyq ǵylymı-zertteý ınstıtýtyna joldanǵanyn habarlaǵan edik.
