Mańǵystaý oblysynda turǵyndar arasynda vaktsına alǵandar kóbeıdi
Kez kelgen qala turǵyny emhanalarǵa kelip, tańdaǵan vaktsınasyn ege alady.
SOFIEMED emhanasynyń dırektory Nádirqoja Musaevtyń aıtýynsha, sáýir aıynan bastap vaktsına alý naýqany bastaldy.
Aldymen ózimizdiń medıtsınalyq qyzmetkerler, muǵalimder men organ qyzmetkerleri vaktsına aldy. Mamyrdan bastap halyqty jappaı vaktsınatsııany bastadyq. Osyǵan oraı klınıkadaǵy 7 dárigerimizdi vaktsına alý boıynsha oqytyp, sertıfıkat aldyq. Oǵan qosa 7-8 medbıkeniń de ruqsaty bar. Bul jerge kelgen adamdar dárigerge kórinedi. Eger janama áserler bolmaı, vaktsına alýǵa qarama-qaıshylyq týmasa, tirkeýden ótedi. Tirkeýden keıin vaktsına alyp, demalý kabınetinde 30 mınýt dáriger qaraýynda bolady. Alǵashqy kúnnen bastap 4 brıgada jumys istep jatyr. Eki brıgada osynda, ekeýi eńbek ujymdaryna jyljymaly qyzmet etedi, - dedi ol.
Dárigerdiń aıtýynsha, eńbek ujymdarynan jyljymaly brıgadalarǵa vaktsına alýǵa suranys jıi kelip túsedi.
Jyljymaly brıgadalar 50-100 qyzmetker jumys isteıtin iri ujymdarǵa shaqyrtý alyp turady. Suranys bildirgen eńbek ujymdaryna baryp vaktsına egedi. Qazir kúnine emhanaǵa vaktsına alýǵa 250-300 adamǵa deıin keledi. Mekemege tirkelgen turǵynnyń 50 paıyzy vaktsına alýy kerek. Ol 15-16 myń adamdy qurap otyr. Eger kúnine 250-300 adamnan ekpe alsa, tamyz-qyrkúıek aılarynda mejege jetemiz. Emhana qyzmetkerleriniń 93 paıyzy vaktsına alǵan.
SOFIEMED emhanasynyń epıdemıolog dárigeri Qaırat Órmekeshov atap ótkendeı, emhana 30 myń adamǵa qyzmet kórsetedi.
30 myń halyqqa qyzmet etetin mobıldi brıgada men fıltr kabınetteri bar. Koronavırýsqa qarsy vaktsına salatyn 4 ekpe brıgadasy jumys isteıdi. Mobıldi brıgadalar koronavırýspen aýyrǵan, baılanysta bolǵan naýqastardyń úılerine baryp emdeý sharalaryn júzege asyrady. Qazirgi tańda indetpen kúresý boıynsha belsendi qyzmet júrgizilip jatyr, - dedi ol.
Órmekeshovtiń aıtýynsha, emhana qoımasynda qazir vaktsınanyń 4 túri saqtalǵan.
Emhanada vaktsınanyń alǵashqy komponentin 7 myńǵa jýyq adam, ekinshi komponentin 5 myńǵa jýyq adam ektirdi. Bizdegi medıtsına qyzmetkerleri bilikti, arnaıy oqytýdan ótken, - dedi ol.
Vaktsına alýǵa kelgen turǵyndardyń arasynda áleýmettik araqashyqtyq saqtalǵan. Barlyq sanıtarlyq talaptar eskerilgen.
Emhanaǵa vaktsına alýǵa kóppen birge aqtaýlyq turǵyn Qundyz Súleımenova da keldi.
Men ózimniń jáne otbasymnyń, ujymymnyń qaýipsizdigi úshin vaktsına alýǵa keldim. Otbasymda menen basqa áli eshkim almady. Alǵashqy bolyp ózim kelip otyrmyn. Menen keıin qalǵan otbasyndaǵy músheler alýǵa keledi. Mańǵystaý halqy salt-dástúrden kende emes. Barlyq toı-tomalaqtarǵa berik edi. Myna indettiń kesirinen odan tys qaldyq. Sondyqtan elimniń tynyshtyǵy men turǵyndardyń densaýlyǵynyń jaqsy bolǵanyn qalaımyn. Vaktsına alýǵa barlyq turǵyndy shaqyramyn, - dedi Súleımenov.
Turǵynnyń aıtýynsha, qazir halyq arasynda vaktsınaǵa qatysty alyp-qashpa áńgimeler óte kóp.
Ondaı ózin-ózi qorqytyp, tóndiretin aqparatty taratyp jatyr ǵoı. Árkimniń sózine sene bermeı, ózine senip, ózi úshin vaktsına alýy kerek dep oılaımyn. Sebebi vaktsınany ár adam ózi men otbasynyń densaýlyǵy úshin alady. Meniń áriptesterim men týysqandarym vaktsına aldy. Olardyń jaǵdaıy jaqsy. Eshkimde janama áser baıqalmaǵandyqtan men de keldim. Meniń aınalamdaǵy adamdar Spýtnık V vaktsınasyn ekti. Sol sebepti meniń de tańdaýym osy vaktsınaǵa tústi, - dedi ol.
Vaktsına alýǵa kelgen taǵy bir qala turǵyny Edýard Albertovıchtiń pikirinshe, indetten qorǵanýdiń birden-bir joly – ekpe alý.
Eń durysy vaktsına qabyldaý. Eger ekpe alsa, aýrý taralmaıdy. Al vaktsına qabyldaý deńgeıi tómen bolsa, kóp adam koronavırýs juqtyrady. Basynda ekpe saldyrýǵa qatysty kúmánim bolǵany ras. Qazir 2-shi kompenentti alǵasyn kúdigim tolyq seıildi. Alǵashqysynda dene qyzýym bolmaǵan. Bári birqalypty ótti. Buryn COVID-19-ben aýyrmaǵanmyn. Men osyndaı tańdaý jasadym, - dedi ol.
Sergeı Bolgov vaktsınanyń ekinshi komponentin alýǵa kelgen.
Vaktsınany mindetti túrde alý kerek. Bul árkimniń azamattyq paryzy dep te aıtýǵa bolady.
Jappaı ımmýnıtet qalyptaspaǵansha, barlyǵymyz osylaı aýyra beremiz. Men búgin ekpeniń ekinshi komponentin alýǵa baramyn. Aman-esen júrmin ǵoı. Balalarym da aldy. Jubaıym da alady,-dedi qala turǵyny Sergeı Bolgov.
Keı ájeler nemereleri men qorshaǵan ortany qorǵaý úshin vaktsına alǵanyn aıtty.
Men álsiz toptyń qataryna jatamyn. Júrekte kardıostımýlıator bar. Sáýir aıynda vaktsınanyń eki komponentin aldym. Eshqandaı janama áser bolǵan joq osy ýaqytqa deıin. Vaktsına alý kerek dep oılaımyn. Árkimniń óz pikiri bar. Men vaktsınany ózimniń nemerelerim men qorshaǵan ortany qorǵaý úshin aldym,-dedi qala turǵyny.
Sondaı-aq Mańǵystaý óńiriniń turǵyndaryna ekpe egý boıynsha jyljymaly dıagnostıkalyq medıtsınalyq keshen qyzmet kórsetip jatyr.
Jyljymaly keshen 9 shildeden bastap qyzmet kórsetýge shyqqan.
Jyljymaly keshen tańerteńgi 10:00-den keshki 20:00-ge deıin jumys Іsteıdi.
Aıta keteıik, oblysqa barlyǵy 221 250 doza vaktsına jetkizilgen, onyń ishinde: reseılik Sputnik V: I komponent – 96 150 doza, II komponent – 66 600 doza; QazVac – 7 000 doza; H ayat-Vax – 31 500 doza, CoronaVac – 20 000. Qazir oblys boıynsha birinshi komponentpen 78 135 adam, ekinshi komponentimen 40 631 adam egildi.