Mańǵystaý oblysynda túlekter keshin ashyq alańda uıymdastyrýǵa ruqsat

AQTAÝ. QazAqparat - Bıyl Mańǵystaý oblysynyń mektepterinde sońǵy qońyraý sharasy óńirdiń bas sanıtarlyq dárigeriniń kelisimimen jáne barlyq sanıtarlyq talap saqtala otyryp, 25 mamyr kúni ótkiziledi, dep habarlaıdy QazAqparat tilshisi.

Qoǵamdyq kommýnıkatsııa ortalyǵynda ótken brıfıngte Mańǵystaý oblystyq Bilim basqarmasynyń basshysy Svetlana Tólebaeva málim etkendeı, sońǵy qońyraý saltanatyn uıymdastyrý formaty týraly sheshimdi ár mektep ózi qabyldaıdy.

Onyń aıtýynsha, qorytyndy attestattaý aıaqtalǵan soń 12-14 maýsym aralyǵynda mektep túlekteri úshin ashyq alańda mektep bitirý keshteri uıymdastyrylady.

«Mektep bitirý keshteri bıyl «Táýelsizdik ulandary» taqyrybynda ótedi. Orta bilim týraly attestattar saltanatty jıynda tabystalady. Oqýshylar sany az mektepter bitirý keshin barlyq synyp úshin bir ýaqytta ótkize alady. Eger túlekter sany kóp bolsa, saltanatty sharany ártúrli kúni ótkizýdi qarastyrý qajet. Shara barysynda maskalyq rejım, áleýmettik araqashyqtyq, sanıtarlyq erejeler saqtalýy tıis», - dedi Svetlana Tólebaeva.

Aıta keteıik, bıyl óńirde 11-synypty 7011 túlek bitiredi. Altyn belgige 227 úmitker, úzdik attestatqa 359 úmitker bar.

Koronavırýs boıynsha Qazaqstan óńirlerindegi epıdemıologııalyq ahýaldy baǵalaý matrıtsasyna sáıkes, Mańǵystaý oblysy «jasyl» aımaqta tur.