Mańǵystaý oblysynda teńiz sýyn tuşytatyn iri zaýyt salynady

AQTAÝ. QazAqparat – Mańǵystaý oblysynyń Jańaózen qalasynda teńiz sýyn tuşytatyn iri zaýyt salynady. Kásiporyn shahardyń aýyz sýǵa qajettiligin tolyq óteıdi dep kútilýde, dep habarlaıdy QazAqparat tilshisi.

Qala kúni qarsańynda Jańaózen qalasynyń ákimi Maqsat Ibaǵarov jýrnalıstermen kezdesti. Onyń barysynda jarty ǵasyrlyq tarıhy bar qalany damytýǵa baǵyttalǵan keshendi jospar aıasynda aldaǵy 5 jylda júzege asyrylatyn jobalar jaıynda málim etti.

Qaladaǵy aýyz sý tapshylyǵy da osy keshendi jospar aıasynda sheshimin tabady. Kendirli aımaǵynan teńiz sýyn tuşytatyn iri zaýyt salý kózdelýde. Qazir jobanyń tehnıkalyq negizdemesi jasalyp jatyr. Táýligine 50 myń tekshe metr sý óndirilip, halyqqa taza aýyz sý usynylady.

«Bul, Jańaózen jurtshylyǵynyń tirshilik nárine degen suranysyn tolyq óteıdi. Aýyz sý máselesi bar. Defıtsıt 15 myńdaı eken. Kendirli aımaǵynda teńiz sýyn tuşytý zaýyty salynady. 2021-2022 jyldary salamyz dep otyrmyz. Táýligine (qýaty – red.) 50 myń tekshe metr. Barlyq qajettilikti óteıdi. Qazir tehnıkalyq-negizdemesi jasalyp jatyr. Ol kelesi aıda bitedi»,- dedi qala ákimi M. Ibaǵarov.

Memlekettiń qoldaýy men Úkimet bekitken Monoqalalardy damytý baǵdarlamasynyń aıasynda qalanyń kelbeti kórkeıip, ınfraqurylymy damydy. Bıyl aldaǵy 5 jylǵa arnalǵan keshendi jospar da bekitildi. 48 jobany júzege asyrýǵa túrli qarjy kózderinen 62 mlrd teńge qarjy bólinbek. Qomaqty qarajatty ıgerý bastalyp ketti. Jańaózenge qarasty Rahat aýylynda Mádenıet úıi salynyp jatyr. Al, ashylǵaly jóndeý kórmegen qalalyq Mádenıet úıi jańarýda. Kúrdeli jóndeý júrgizilip, sahna aýystyryldy. Birneshe mektep jóndelip, qajetti quraldarmen jabdyqtaldy. Ortalyq kósheler jaryqtandyrylyp, joldar jóndeldi.

«Qordalanǵan máseleler – eski úıler, 52 úı bar. Olar keshendi josparǵa kirgen. 27 úıge dokýmentatsııa jasalyp qoıdy. Jobalyq-smetalyq qujattamasyn jasadyq. «Samuryq-Qazynanyń» kómegimen osy jyly sol joba sheńberinde3 úıdi jóndeýdi bastap kettik. Osy bir aıdyń ishinde bitiremiz dep kútilýde. Jumystardyń bastalǵanyna 3 aptadaı boldy. Sonymen qatar kelesi jyly Turǵyn úı-kommýnaldyq sharýashylyǵyn jańǵyrtý baǵdarlamasy aıasynda bıýdjetten qarjylandyryp, 24 úıdi jóndeımiz degen jospar bar», - dedi ol.