Mańǵystaý oblysynda shahmattan alǵash ret onlaın chempıonat ótedi

AQTAÝ. QazAqparat – Mańǵystaý oblysynda shahmattan alǵash ret onlaın chempıonat ótedi. Bul týraly óńirlik kommýnıkatsııalar ortalyǵynda ótken brıfıngide Mańǵystaý oblysy shahmat federatsııasynyń dırektory Elbaeva Fatıma Yrysbekqyzy málimdedi, dep habarlaıdy QazAqparat.

Federatsııa basshysynyń aıtýynsha, saıystyń júlde qory 400 myń teńge.

«Shara Mańǵystaý oblysynyń dene shynyqtyrý jáne sport basqarmasy, Shahmat federatsııasy, sondaı-aq «Debıýt« shahmat mektebiniń tehnıkalyq qoldaýymen ótedi. Jarys 2020 jyldyń 19-sáýirinde CHESS.COM. saıtynyń Mangystau Chess Klýbynda «Kaspıı Patshasy« ataýymen onlaın túrde uıymdastyrylmaq. Qatysýǵa nıetti oblys turǵyndary úshin eshqandaı shekteý joq. Tek qana atalǵan saıtta óz akkaýntyn ashyp, ótinim toltyrsa bolǵany»,-delingen habarlamada.

«Jalpy jarys 11 týrdan turady. Blıts rejımde 3 mınýt 2 sekýndtan, ár júris úshin qosylady. Arnaıy osy joba úshin CHESS.COM. saıty tańdaldy. Óıtkeni, atalǵan saıttyń aýqymy keń. Bul saıys shahmatshylar úshin úlken múmkindik dep esepteımin. Jarysty oblys turǵyndary YouTube jelisi arqyly tikeleı baılanysta tamashalaı alady»-, dedi «Debıýt» shahmat mektebiniń basshysy Ánýar Shaıhymov.

Atalmysh básekede baq synaımyn deýshiler úshin ótinim qabyldaý 18-sáýir kúni toqtaıdy. Chempıonatta Almaty, Pavlodar, Qaraǵandy qalalarynan «Halyqaralyq dárejedegi sport sheberleri» onlaın qazylyq etetin bolady. Jarys qorytyndysy 2 kúnnen keıin jarııalanyp, qatysýshalar aqshalaı syılyqtarmen marapattalady.

«Búgingi kúnge deıin 100-ge jýyq qatysýshy tirkelgen. Alda mundaı chempıonattyń qalalyq, oblystyq kezeńderin ótkizý josparda»,- deıdi uıymdastyrýshylar.