Mańǵystaý oblysynda óndiris pen kásibı tehnıkalyq mekemelerdiń tıimdi árekettestiginiń tájirıbesi jınaqtalǵan - Oblys ákimi
ASTANA. QazAqparat - «Tehnıkalyq jáne kásiptik joǵary bilim berý júıesinde ekonomıka salalary úshin kadrlar daıarlaýdyń sapasy men perspektıvalary týraly» parlamenttik tyńdalymda sóz sóılegen Mańǵystaý oblysynyń ákimi Alık Aıdarbaev aımaqtaǵy bilim oshaqtary men kásiporyndar arasyndaǵy tıimdi seriktestik tájirıbesimen bólisti.
Aımaqtyq kólik logıstıkalyq toraptaǵy Mańǵystaý múmkindigin atap ótken A.Aıdarbaev bolashaqta oblysta halyqaralyq júk tasymaldaý salasynda Qazaqstan mártebesin kóteretin birqatar jobalar júzege asyrý kerek ekenin jetkizdi. Bul jobalardy júzege asyrý úshin bilikti kadr tartý qajet.
A.Aıdarbaevtyń sózine qaraǵanda, búginde óńirde kadrlardy daıyndaýmen 5212 adam bilim alatyn 2 JOO, 26 myń stýdenti bar 24 kolledj bar. Olar 115 mamandyq boıynsha bilim alýda, onyń 12 myńy memlekettik tapsyrys boıynsha oqyp jatyr.
Óńirdegi kásibı mamandar suranysyn qanaǵattandyrý úshin, sondaı-aq, mamandardyń básekege qabilettiligin arttyrý maqsatynda oblystyń barlyq kolledjderinde qosymsha aǵylshyn tilin úıretý engizildi. Aıta ketý kerek, 3 oqý ordasynda (týrızm, polıtehnıkalyq, gýmanıtarlyq) pılottyq rejimde qytaı tili úıretiledi.
Onymen qosa, óndiristik tájirıbeden tolyqqandy ótý men jumysqa ornalasý múmkindiginiń bolýy úshin kásiporyndarmen kelisimsharttar jasalýda. 2012 oqý jylynda 504 kelisimshartqa qol qoıyldy, 2013 jyly olardyń sany 590-ǵa jetti.
- Seriktestik óz jemisin berdi: sońǵy úsh jylda kásiporyndardyń qoldaýymen bilim alatyn stýdentterdiń sany 52-den 227-ge deıin ósti. Biraq biz bul qarym-qatynasty nyǵaıtýǵa nıettimiz. Qazirgi tańda 8 kolledjde 11 mamandyq boıynsha dýaldy bilim berý júıesiniń elementteri engizilýde. Jańa oqý jylynan mundaı júıeniń elementterin taǵy 7 kolledjde engizý josparlanǵan, - dedi A.Aıdarbaev.
Óńir basshysy yqpaldastyqty nyǵaıtý úshin shaǵyn jáne orta bıznes kásiporyndary men oqý ordalaryndaǵy seriktestikti yntalandyrý mehanızmin daıyndaý qajet dep esepteıdi. Bul jumysty Bilim jáne Ǵylym mınıstrligi men kásipkerlerdiń ulttyq palatasy birigip jasaǵany durys.
