Mańǵystaý oblysynda oqýshylar sany bes jylda 38 myńǵa artqan
AQTAÝ.QazAqparat – Mańǵystaý oblysynda sońǵy 5 jylda oqýshylar sany 38 myńǵa artqan. Bul týraly Aqtaýda ótken pedagogterdiń tamyz keńesinde aıtyldy, dep habarlaıdy QazAqparat tilshisi.
Óńirde oqýshy sany artqan. 3 aýysymdy oqýdy joıý maqsatynda bıyl oblysta 2 mektep paıdalanýǵa berilmek.
«Jyl sońyna deıin eki mektep, japsarlastyra salynǵan eki ǵımarat paıdalanýǵa beriledi. Sonymen qatar osy jyly 11 jekemenshik mektep ashylady», - dedi konferentsııada Mańǵystaý oblysy ákiminiń orynbasary Ulyqbek Tnalıev.
Bıyl óńirdegi 21 mektepke jóndeý júrgizilip, jańa motıfıkatsııalyq kabınettermen jabdyqtalǵan. Sondaı-aq bes myń oryndyq bes mekteptiń qurylysy júrip jatyr. Al 2023-2025 jyldary óńirde 27 mektep boı kóteredi. Oǵan qosa memlekettik «Jaıly mektep» jobasy aıasynda taǵy 9 bilim ordasyn turǵyzý josparlanǵan.
Málim bolǵandaı, qoldaýdy qajet etetin 35 myń oqýshyǵa Jalpy mindetti bilim qorynan 1 mlrd 400 mln teńge qarastyrylǵan. Sonymen qatar «Mektepke jol» aktsııasy aıasynda óńir kásipkerleri 15 myńnan astam oqýshyǵa kómek kórsetti.
