Mańǵystaý oblysynda Qyzyl kitapqa engen balyqty aýlaǵandar ustaldy
ASTANA. QazAqparat - Mańǵystaý oblysynyń Túpqaraǵan aýdanynda zańsyz balyq aýlaǵan brakonerler ustaldy. Qaıyq motory, balyqshy kıimi, sonymen birge aýlar tárkilendi. Bul týraly QR AShM Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat.
Sáken Dildahmettiń habarlaýyna qaraǵanda, 2018 jyldyń 11 qańtarynda Mańǵystaý oblysy Túpqaraǵan aýdanynyń orman sharýashylyǵy jáne janýarlar dúnıesi ınspektsııasy qyzmetkerleri reıd júrgizgen. Reıd barysynda Túpqaraǵan aýdanynyń «Begeıliǵalı» mekeni men kól aralyǵynda úsh ÝAZ kóligi men «Nıva» markaly avtokólik toqtatylyp, tekserilgen.
«ÝAZ kóligin tekserý kezinde salonnyń ishinen «Bekire» tuqymdas 22 balyq, usaq balyqtar, QR Qyzyl kitabyna engizilgen aqbalyq tabyldy. Ekinshi ÝAZ kóligin tekserý barysynda odan bekire tuqymdas 11 balyq anyqtaldy. Nıva avtokóliginen «Tahatsý» aspaly qaıyq motory, balyqshy kıimi, traldaý óndirisine arnalǵan qurylǵylar, balyqty tunshyqtyrýǵa arnalǵan aǵash taıaqsha men balyqty aýdan alyp shyǵýǵa arnalǵan ilmek tabyldy», - dep jazady Sáken Dildahmet.
Oqıǵa ornyna Túpqaraǵan aýdany ІІB-niń jedel toby shaqyrylyp, tártip saqshylaryna barlyq materıaldar tapsyrylǵan.
Atalǵan oqıǵa boıynsha Túpqaraǵan aýdanynyń Іshki ister bóliminde qylmystyq is qozǵalyp otyr.
