Mańǵystaý oblysynda qustardyń óleksesi tabyldy

NUR-SULTAN. QazAqparat – Balyqshylar mańǵystaý oblysynyń Baýtıno jáne Atash kentterinde jaǵalaýdan 160 óli sýquzǵyn tapqan. Bul týraly Mańǵystaý oblystyq orman sharýashylyǵy jáne janýarlar álemi aýmaqtyq ınspektsııasynyń bólim basshysy Turǵanbaı Shapaǵatov málim etti, dep habarlaıdy QazAqparat lada.kz saıtyna silteme jasap.

Onyń aıtýynsha, mamandar sýquzǵyndardan adam áreketteriniń belgilerin tappaǵan. «Qustar Qyzyl kitapqa enbegen. Adamdardyń buǵan qatysy joq, olardyń qyrylýy ekologııamen baılanysty bolýy múmkin. Ekologııa mamandary sý, aýa synamasyn jáne qustardyń etinen materıaldar aldy. Nátıjesi kelse mindetti túrde habarlaımyz. Biz olardyń jappaı qyrylýyn 2-3 kún buryn bolǵan qatty daýylmen baılanystyryp otyrmyz», - dedi Turǵanbaı Shapaǵatov.

Eske salaıyq, buǵan deıin óńir turǵyndary Fort-Shevchenko aýdanynda sý aıdynynan qyrylyp qalǵan qustardy vıdeoǵa túsirip alǵan bolatyn. Oqıǵa ornyna birneshe vedomstvo mamandary bardy. Onyń nátıjesi týraly alynǵan synamalarǵa zertteý júrgizilgennen keıin habarlaıdy.